To start downloading books

Please sign in or create an account.

الظواهري څوک و او څنګه ووژل شو؟

الظواهري څوک و او څنګه ووژل شو؟

د یکشنبې پر سهار د کابل شېرپور سیمه کې پر یوه کور د مزایل برید سره سم پر خواله رسنیو د دې برید د نوعیت په اړه ضد او نقیض رپوټونه خپاره شول.

طالبانو په لومړي سره کې وویل چې هلته پر یوه تش کور راکټي برید شوی او مرګژوبله نه لري.
خو پر خواله رسنیو داسې ګنګوسې وې چې ګواکې دا یو ډرون برید و او د امریکا لخوا ترسره شوی دی.
یو شمېر پخوانیو افغان امنیتي‌ چارواکو او خبریالانو هم د ډرون برید خبره کوله او په دې ګومان وو چې ګواکې امریکا کابل کې د داعش ډلې وسلوال په نښه کړي‌ دي.

د طالبانو ویاند ذبیح الله مجاهد دوشنبه ناوخته پر خپل ټوېټر ومنله چې امریکا کابل کې ډرون برید کړی او د ده په ټکو د دوحې تړون یې مات کړی دی.
افغانستان او اروپا کې د دوشنبې تر شپې ناوخته لا هم روښانه نه وه چې د برید هدف څوک و.
خو بلاخره یو شمېر باوري رسنیو بېړنی خبر ورکړ چې دې برید کې د القاعدې شبکې مشر ایمن الظواهري وژل شوی دی.
څو ساعته وروسته د امریکا ولسمشر جو بایډن سپینه ماڼۍ کې د رسنیو مخې ته راڅرګند شو او د امریکا ډرون برید کې د الظواهري وژنه یې تائید کړه.
خو د ولسمشر بایډن په وینا کې هم ځینې هغه مهمې پوښتنې ځواب نشوې چې د نړۍ په لر او بر کې یې خبریالان، شنونکي او عام خلک کوي.‌

ایا طالبان له دې هر څه خبر وو؟
د طالبانو ویاند ذبیح الله مجاهد دوشنبه ناوخته په خپل ټویټ کې دا نه ده روښانه کړې چې د امریکا ډرون برید کې څوک په نښه شوي.
ولسمشر جو بایډن هم خپله وینا کې د طالبانو نوم وانخیست او دا یې هم ونه ویل چې ایا دا ډله کابل کې د القاعدې د مشر پر شتون خبره وه که نه.
خو یو جګپوړي امریکایي چارواکي د ولسمشر بایډن له وینا وړاندې رسنیو سره په دې اړه ځینې جزئیات شریک کړي.
د دې چارواکي په وینا، الظواهري کابل د یو داسې کس په کور کې اوسېده چې د طالبانو د کورنیو چارو وزیر او د حقاني شبکې مشر سراج الدین حقاني ته نږدې کس بلل کېږي.
دې چارواکي همدا راز ادعا کړې چې له برید وروسته طالبانو پر دې پېښه د پردې اچولو لپاره د الظواهري مړی له ځان سره وړی او د هغه د کورنۍ غړي یې هم بل ځای ته لېږدولي‌ دي.
یاد چارواکی وایي، له دې پېښې داسې ښکاري چې طالبانو کې ځینې کسان د الظواهري‌ پر شتون خبر وو او مرسته یې ورسره کوله.
طالبانو دې څرګندونو ته لا کوم غبرګون نه دی ښودلی، خو په تېر کې یې تل ټینګار کړی چې د القاعدې شبکې غړي په افغانستان کې نشته.
خو دا پوښتنه مهمه ده چې څنګه د نړۍ یو تر ټولو مطلوب کس او د یوې نړیوالې ترهګرې ډلې مشر وتوانېد چې کابل ته لاړ شي او هلته په یوه مشهوره سیمه کې په یوه لوی کور کې له خپلې کورنۍ سره ژوند وکړي.

امریکا د الظواهري ځای څنګه مالوم کړ؟
ګڼو رسنیو خبر ورکړی چې دا برید د امریکا د استخباراتو مرکزي ادارې (سي ای اې) لخوا ترسره شوی دی.
ولسمشر بایډن هم خپله وینا کې د امریکا د استخباراتي‌ ادارو مننه وکړه چې په بریالیتوب سره یې یو مهم هدف په نښه او له منځه یووړ.
نوموړي دا هم وویل چې امریکا څو میاشتې مخکې خبره وه چې د القاعدې مشر کابل ته کوچېدلی او هلته له خپلې مېرمنې، لور او لمسیانو سره په یوه کور کې اوسي.
دلته مهمه پوښتنه دا ده چې امریکا د ایمن الظواهري ځای څنګه مالوم کړ او دې برخه کې چا ورسره استخباراتي‌مرسته کړې وه.
د یادولو ده چې امریکا د تېر کال اګست میاشتې راهیسې افغانستان کې هېڅ ډول پوځي حضور نه لري او له کابله یې خپل سفارت هم دوحې ته لېږدولی دی.
نو په دې اړه اټکل ګران دی چې له امریکا سره به د دې برید په پلانولو او عملي کولو کې چا مرسته کړې وي.
طالبانو رسماً دا برید غندلی، نو ځکه نشي ویل کېدای چې یادې ډلې به دې برخه کې پخپله امریکایانو سره کومه مرسته کړې وي.
خو پر خواله رسنیو وار د مخه ځینې ګنګوسې یا په بله معنا د توطئې تیورۍ رامخې ته شوي دي.
ځینې کسان په دې باور دي چې ښایي پاکستان امریکا ته د الظواهري د ځای ځایګي‌ په اړه مالومات ورکړي وي.
د دې کسانو په وینا، اسلام اباد د دې مالوماتو په بلد کې له واشنګټن غواړي‌ چې د پیسو له نړیوال صندوقه د پور ترلاسه کولو برخه کې ورسره مرسته وکړي.‌


د امریکا او طالبانو اړیکې به څنګه شي؟
د دې برید په اړه د ولسمشر جو بایډن په وینا کې تر ټولو د پام وړ خبره هغه وه چې نوموړي هېڅ ونکړه - او هغه دا چې په دې ټوله چاره کې د طالبانو رول څه و؟
ډېری خلک دا پوښتنه کوي‌ چې که طالبانو د القاعدې مشر ته په پټه پناه ورکړې وه نو اوس به د دې ډلې او امریکا اړیکي‌ څنګه کېږي.
یو جګپوړي امریکایي چارواکي که څه هم طالبان د القاعدې مشر ته په پناه ورکولو تورن نه کړل، خو ګومان یې وښود چې ګواکې طالبانو کې ځینې کسان خبر وو چې الظواهري کابل کې دی.
دې چارواکي رسنیو ته ویلي، دا پېښه، یعنی د افغانستان پر خاوره د القاعدې شتون له دوحې تړونه سرغړونه ده او امریکا به دې برخه کې طالبانو سره حساب کوي.
دلته یو بل مهم ټکی باید یاد شي - طالبانو که څه هم افغانستان کې د القاعدې د شتون په اړه رپوټونه تل رد کړي، خو د دې ډلې ویاند ذبیح الله مجاهد څه موده وړاندې بي بي سي سره خبرو کې ویلي وو، افغانستان یو خپلواک هېواد دی او دا په دوی (طالبانو) پورې اړه لري‌ چې چا ته افغانستان کې د اوسېدو اجازه ورکوي.
نوموړي هغه مهال ویلي وو، د دوحې تړون کې یوازې دا ژمنه شوې ده چې د افغانستان خاوره به د کوم هېواد پر ضد نه کارول کېږي.
له دې څرګندېږي چې امریکا او طالبان د دوحې تړون د دې مهمې مادې په اړه جلا تفسیر او دریځونه لري.
دا برید داسې مهال کېږي چې پر افغانستان د طالبانو د واکمنۍ یو کال بشپړېدونکی دی او یادې ډلې دې موده کې له امریکا سره پر ګڼو موضوعاتو مذاکرات روان ساتلي‌دي.
دې لړ کې یوه تر ټولو مهمه موضوع په امریکا کې د افغانستان د کنګل شویو شتمنیو ده، هغه میلیاردونه ډالر چې طالبان یې غوښتنه کوي‌ همدا تېره اوونۍ یې په دې اړه له امریکایي‌ دیپلوماتانو سره خبرې اترې هم شوې وې.

د القاعدې راتلونکی به څه وي؟
اسامه بن لادن که څه هم یو کرېزماتیک کس او د القاعدې شبکې څېره بلل کېده، خو ایمن الظواهري هغه څوک و چې د پردې تر شا یې د دې ډلې د 'مغز' رول درلود.
نوموړي د نړۍ ګڼو هېوادونو ته د القاعدې شبکې غځولو کې مهم رول درلود، او ځینې خو ان په دې باور دي چې پر امریکا د سپتمبر ۱۱مې د بریدونو اصلي‌ طراح هم دی و.‌
نوموړي له افغان طالبانو سره هم نږدې اړیکې درلودې او د دې ډلې تر سیوري‌ لاندې یې افغانستان کې وخت هم تېر کړی و.
د نوموړي‌ وژنه بې له شکه چې د القاعدې لپاره یوه لویه ضربه ده، ځکه دی د دې شبکې د بنسټ اېښودونکو کسانو په ډله کې و.
ځینې شنونکي په دې باور دي‌ چې د القاعدې یو بل مهم غړی 'سیف العدل' ښایي اوس د دې شبکې مشر ونومول شي.
سیف العدل په خټه مصرۍ دی او پخوا یې. مصر په پوځ کې دنده هم ترسره کړې ده.
د نوموړي په اړه ویل کېږي چې یو سخت دریځه کس دی او په تېر کې یې ګڼو هېوادونو کې پر امریکایي پوځ او سفارتونه بریدونو کې لاس درلود.
پوښتنه دا ده چې ایا د القاعدې راتلونکی مشر به وتوانېږي چې دا شبکه فعاله او یو موټی وساتي، ځکه ان د الظواهري د ژوند په وروستیو کلونو کې هم دا شبکه ډېره فعاله نه وه او خپل پخوانی برم او حیثیت یې له لاسه ورکړی و.
ان د نړیوالو لپاره هم اوس ښایي‌ القاعده اوس ډېره مطرح نه وي،‌ ځکه د داعش په څېر ډلې په تېرو څو کلونو کې د القاعدې ځای نیولی او لویدیځې نړۍ ته په لوی ګواښ بدله شوې.
ب.ب.س

Related Articles

حلیل بي مسجد_یونان

#حلیل_بي_مسجد_یونان 🇬🇷 د اوسني یونان هیواد په (کیوالا) Kavala ښار کې د (پیننسولا) پۀ سیمه کې هغه جامع او تاریخي جومات، کوم چې عیسایانو قصدًا د (موسیقۍ) په مرکز باندي بدل کړ!!! دغه تاریخي جومات او مدرسه پۀ 1530 میلادي کال باندي د عثماني خلافت نامتو حکمران سلطان سلیمان القانوني په وختونو کې تعمیر او تکمیل شول، متأسفانه 1832 میلادي کال باندي په یونا...

نړیوال سیاسي اسناد(اخلاقي او نزاکتي موفقتنامې) څه دي؟

نړيوال سياسي اسناد ( اخلاقي او نزاکتي موافقتنامې ) Gentlemen’s Agreements سياسي اسناد د حقوقي اسنادو برعکس ذيدخله لوريو ته حقوق او وجايب نه راجع کوي او اړونده لوري يې په تطبيق مکلف نه ګڼل کېږي بلکې دغه اسناد يوازې اخلاقي او نزاکتي جنبه لري يعنې د اخلاقي او نزاکتي حيثه اړونده لورې دغو موافقتنامو ته احترام کوي. د نړيوالو سياسي اسنادو له طريقه دولتو...

د لوی درذ څخه مخکی څه وه او د کائینات په هغه وخت کي کله چي مطلق هیڅ هم نه وه ماده څنګه په وجود راعله

ګرانو ملګرو د انسان دماغ له  سوالاتو ډک دی او په دغه سوالاتو کي دومره طاقت سته چي په واسطه یي دنیا بدلیدلای سي.نن همداسي یو سوال زما  په دماغ کي هم  ژوند اخیستی او سوال دا دی چي د لوی درذ څخه  مخکي څه وه؟آیا د مادې څخه  ډک یو کوچنی جسم وو کوم چي  د ټوله کائینات کتله  یی درلودل؟که هغه وخت  د مادې څخه ډک  یو کوچنی شکل شتون درلود نو دا شکل څنګه په وجو...

Recommended Articles

ملا نصرالدین څوک و؟

ملا نصرالدين ته ترکان حواجه يا خواجه نصرالدين وايې، افغانان او اير انيان يې ملا نصر الدين (ملا نصرودين) بولي،عربان يې دجحا نصرالدين او افندي نصرالدين په نامه پيژني٠  ملا نصرالدين د يوه روايت پر بنسټ په اوومې هجري پېړۍ کې چې د١٢٠٩ زېږدېز/میلادي کال سر ه سمون خوري دسلجوقي واکمنۍ په زمانه کې دتر کيې دخورتو په ښار ګوټي کې دې نړۍ ته سترګې پرانيستلي دي...

له مطالعې سره څنګه ځان عادت کړو؟

لیکنه ـ ریاض مقامزی د هر لوستي ځوان لپاره دوامداره مطالعه ډېره اړينه او مهمه ده. که تاسو دوامداره مطالعه کوئ، ذهن به مو فعال وي او هېڅکله به په وینا کې له بندښت سره مخ نه شئ. ددې ترڅنګ مطالعه ګڼې نورې ګټې هم لري. موږ نه غواړو، چې تاسو ته د مطالعې پر ارزښت وغږېږو. یوازې غواړو، تاسو ته ددې لارښوونه وکړو، چې څنګه دوامداره مطالعه خپل عادت وګرځوو. آیا...

په ځوانۍ کې د ويښتانو سپينېدل او درملنه

د ويښتانو سپينېدل اکثراً د زړښت معنا ورکوي نو ځکه خو انسان د خواشينۍ احساس کوي؛ مګر دا لا ډېره خواشينوونکې وي، چې په ځوانۍ کې مو ويښتان سپين شي. په طبیعي توګه د سپين پوستو ويښتان نسبت تورپوستو ته ژر سپینېږي. معمولاً په سپين پوستو کې د ويښتانو سپينېدل د ژوند د څلورمې لسیزې په لومړيو کې پيلېږي، مګر په نورو نژادونو کې دا حالت د څلورمې لسیزې په وروستيو...