مینه څه ده؟

مينه څه ته وايي ؟ مينه يو طبيعي پديده ده ، چې انسان یې دخپل انساني او محيطي ماحول سره د فکري او فزيکي متواتر تماس او رابطې ، عمل او عکس العمل ، راشه درشه ، تعامل او دروحي او جسمي تغذيې د ارضا په اساس د هغه د زېږېدو سره شروع کيږي او تر مرگه پورې دوام کوي . . د ماشوم په زېږیدو اول دا رابطه او تماس فقط دمور او دهغی دغېږې او تيو سره وي ، ځکه هلته ورته سكون وي او دهغی نه تغذیه کيږي ، خو د زمان په تېریدو او دماشوم په لویيډو د پلار ، وروڼو ، نورو خپلوانو ، کلیوالو ، ښاریانو ، وطنوالو او بالاخره نظر په تماس او فکري_جسمي ودې د ټول بشريت سره دا مینه رشد کوي .مگر د ډيروالي او کموالي مقياس يې دانسان د تماس او رابطي په زياتوالي او لږوالي پورې تعلق لري . طبعاا د انسان تر ټولو زیات تماس او رابطه اول د مور او دمور داوسېدو د ځای یعنی کور سره وي ، نو مینه او علاقه ئی هم دمور سره ترنورو ډېره وي او بيا بالترتيب دپلار ، کورنۍ ، خپلوانو ، آشنایانو ، کلیوالو ، وطنوالو او انسانو سره . دغه دئ د مینې او د هغی د پالنې راز ماهیت او درجه بندي . اوس که څوک ووايي چې زه دمور په کیسه کې نه يم او ماته بشریت اولویت لري ، يا زه اول جهان جوړوم او بيا خپل کور . داسې اشخاص یا دروغ وايي او يا د عقل د زوال سره مخامخ دي ، چې په دواړو صورتونو کې دحقیقت خلاف د سيند د طبيعي مسير د حقيقت نه انکار او دبدلولو دپاره بې ځايه زورونه وهي ، چې بې له غرقېدو او ناکامۍ بل څه متاع نه ترې حاصليږي د ، ب ، هیښ . هره مفکوره ، نظریه ، تفکر ، عقیده او اډيالوژي چې د افراط پولې ته تقرب کوي د انسان او ټولنې دپاره په مصیبت بدليږي او ټولنه د هلاکت لور ته سوق كوي