لیکنه: لیمه دلیل
ذهني آرامي او د ذهن کنټرول
- آیا تاسو هم له ډیرو فکرونو ځوریږئ؟
- آیا ذهن مو خپل کنټرول کې دی؟
که ژوند کې بریا غواړئ، نو له ذهن نه مو باید په غوره شکل استفاده وکړﺉ او دا هغه وخت شونې ده چه ذهن مو راټول وي او خپل افکار مو کنټرول کې وي. خو که فکرونه کنټرول نه کړئ، دا به ستاسو او د ژوند تر منځ ډیر واټن رامنځته کړي.
بې کنټروله ذهن ته د هر ډول فکرونو تګ راتګ بې له کومې دمې څخه ممکن په ساعتونو دوام وکړي. دا ډول به مو ذهن ډیر مصروف وي او دا به یې ستړی کړي. په پایله کي به مو په وجود کی هم بې له دې چې کوم کار مو کړی وي ژوره ستړیا احساس کوئ. دا فکرونه به هر ډول وي راځی، دمه کوي او تاسو ځان سره مصروفوي. همداسې دا ځي بل راځی. مثلاً که تاسو نیم ساعت خپلې سترګې پټې کړﺉ او ذهن ته متوجه شئ، و به ګورئ چې ډېر زیات او هر ډول فکرونه دي، چې ذهن ته مو ځي او راځي. ممکن دا فکرونه د کور، دفتر، مملکت، خلکو، ژوند، تېرمهال، راتلونکې او... اړوند واوسي.
خو اصلی موضوع دا ده چه که ذهن مو خپل تسلط او اختیار کی ونه نیسئ، تاسې به د آرام ذهن او آرام ژوند له نعمت څخه بې برخي شئ. ممکن ژوند کې ډېر څه ولرۍ خو چې فکري آرامښت و نه لرئ، داسې یې وګڼئ چې هیڅ نه لرئ.
تاسو باید پام وکړﺉ چې د خپلو فکرونو بنديوان نه شئ. مولانا څه ښه وایي: "بریا د هغو انسانانو په برخه ده، چې د خپلو افکارو حاکم و اوسي نه محکوم." او دا حتی د خوشبختۍ یو لوي راز ده چه ذهن مو خپل کنټرول کې ونیسئ او هر ډول فکر بې له خپلې اجازې ذهن ته ور پرې نږدﺉ.
دوه مهم تکتیکونه
په دې برخه کې به تاسو د ذهن د کنټرول او پر فکر د واک پيدا کولو دوه ډېرې آسانې او ښې طریقې وپېژنئ. ترڅو په راتلونکي کې د خپل فکر اختیار پخپل لاس کې واخلئ.
لومړی
که غواړئ چې ذهن مو کنټرول کړﺉ، یعنې ذهني آرامښت او تمرکز ولرئ باید د مزاحم کوونکو افکارو راتګ ته "نه" ووایئ. داسې چې مزاحم فکر مخاطب کړﺉ او ورته ووایئ: "زه اوس نه غواړم ستا اړوند فکر وکړم." که د فکر مزاحمت او راتګ بېحده زیات وو نو نظر په موضوع د یو څو شېبو یا یو ساعت لپاره ورته یا هماغه اوس او یا وروسته وخت ورکړئ او په اړه یې فکر وکړئ، خو بیا بېخي د هغه اړوند فکر مه کوﺉ. دا ممکن لومړیو کې سخت وي؛ خو ورو ـ ورو ذهن عادت کېږي. کله چې ذهن وګوري تاسو هر ډول فکر ته په هر وخت کې د راتګ اجازه نه ورکوئ وروسته یې دی هم پر مخ دروازه بندوي او ذهن به مو په مربوطه موضوع کومه چې تاسو غواړئ متمرکز وي.
دویم
بل دا چې که ذهن د یو څه مودې لپاره بېخي له هر ډول فکر او سوچ لرې او کاملاً تش وساتئ، یعنې ذهني سکوت ولرئ نو عالي بدلون به ووینئ. که حتی د دېرشو ثانیو لپاره هم ذهن تش وساتئ ممکن د ساعتونو ـ ساعتونو ستړیا مو رفع شي. د دې لپاره هم یو میتود دا ده چې ذهن ته ووایئ : "زه ګورم چې اوس مې لومړی کوم فکر ذهن ته راځي؟ "ستاسو به پام شي چې ذهن ته به مو د یو څه مودې لپاره هیڅ هم رانه شي داسې به ډېر زیات د آرامۍ احساس وکړﺉ.
دا ډول د ذهن کنټرول په تمرین او د وخت په تېرېدو سره لا پیاوړی کولای شئ. یوازې باید په جدیت او قاطعیت سره ادامه ورکړئ.
د خپل وخت او انرژۍ ضایع کول بند کړﺉ. د پیاوړي ذهن، ژور تمرکز او ذهني آرامښت سره مو ژوند ته خوشحالي راولئ.
