لیکنه ـ ریاض مقامزی
وروستۍ څو لسیزې د ټيکنالوژۍ، صنعت او نورو برخو د پرمختګ او اوج لسیزې بلل کېږي. د نورو ټولو پرمختګونو ترڅنګ په فضايي برخه کې هم بې ساري اسانتیاوې او پرمختګونه ترسترګو شوي دي.
پخوا به فضايي سفرونو یوازې او یوازې څېړنیزه بڼه درلوده؛ مګر اوس داسې برېښي چې فضا ته سیاحتي او چکري سفرونه هم پیل شوي او لرې نه ده، چې دا سفرونه لا ډېر شي.
تاسو به په دې لیکنه ددې لړۍ د پیل سفر په اړه پوه شئ.
فضا ته لومړنی سیاحتي سفر
په وروستيو کې یوه خصوصي امریکايي شرکت (سپیس ایکس) اعلان کړی و، چې فضا ته به یو سیاحتي سفر پیلوي. بالآخره دا چاره ترسره شوه او یاد شرکت فضا ته د څلورو تنو په لېږلو بریالی شو. په دې سفر کې فضايي کيپسول د "فالکون ۹" راکیټ په مرسته فضا ته واستول شو. په دې سفر کې څلورو تنو برخه لرله او له درې ورځني سفر وروسته بېرته د ځمکې کرې ته راستانه شول. هېره دې نه وي، چې دا څلورتنه ټول ملکي وګړي وو.
څه وشول؟
د تېرې چهارشنبې په ورځ د سپیس ایکس شرکت خپله فضايي بېړۍ فضا ته واستوله. څلورو سیاحتي سفرکوونکو په فضا کې درې ورځې شپې تېرې کړې او د یکشبنې په شپه بېرته د اطلس اقیانوس، د فلوریډا په سواحلو کې ځمکې ته را وګرځېدل. رسنیو ددې سفر څلورو تنو نومونه په دې ډول ښودلي:
- جرد ایزاکمن
- هیلی ارسینوکس
- شان پراکتور
- کریس سیمبروسک
اټکل څه دی؟
شنونکي پر دې باور دي، چې کېدای شي له دې وروسته ګڼې لويې کمپنۍ په دې برخه کې پانګونه وکړي او په دې توګه به ډېر انسانان لېوالتیا پیدا کړي چې فضا ته په سیاحت لاړ شي.
دوی زیاتوي، چې اوس دا سفرونو خورا قیمتي تمامېږي؛ نو ممکن یوازې شتمن خلک له دې سفرونو خوند واخلي. خو د ټيکنالوژۍ او صنعت په برخه کې چټک پرمختګ ښیي، چې شاید دا سفرونه ارزانه شي او ډېر خلک به وکولای شي، چې فضا ته ولاړ شي.