لیکنه: شکېبا نادري، څنګه د سپینو زرو له اصل توب څخه ځان ډاډه کړو؟
دا ښکاره خبره ده چې د ښځینه وو ګاڼې ډېر خوښېږي، که هغه سره زر وي، که سپین زر وي او یا د غمیو شیان وي، خو په اوس مهال کې د سرو زرو بیه دوه برابره لوړه شوې ده او ډېری خلک د دې وس نه لري چې ویې پېري، نو د سرو زرو پر ځای سپین زر اخلي.
سپین زر د هغو ګاڼو له ډلې څخه دي چې د انسان پر لاس، ګوتې او غاړې د نورو ګاڼو په پرتله ښایسته ښکاري او ډېری ښځې یې خوښوي.
د سپینو زرو پېژندل دومره اسانه کار نه دی، ځکه داسې مسلکي کسان شته داسې ګاڼې جوړوي چې د سپینو زرو سره یې په ډېرې سختۍ سره توپیر کېږي.
موږ په دې لیکنه کې تاسو ته د سپینو زرو د اصل توب د پېژندلو څو لارې درښیو، که غواړئ چې څوک مو تېر نه باسي او د سپینو زر پر ځای درباندې اوسپنه ونه پلوري، نو زموږ دا لیکنه تر پایه ولولئ!
۱. په سپینو زرو کې لیکل شوې شمېره باید وګورئ!
د سپینو زرو د پېژندلو تر ټولو غوره لاره دا ده چې په خپلې پلورل شوې ګوتې، غاړکۍ او یا لاس بند کې لیکل شوې شمېره یا نښه وګورئ که دا شمېرې ۹۲۵، ۸۰۰، ۹۰۰ او یا د انګلیسي ژبې S توری و چې
silver یا sterling
څخه اخیستل شوی دی او موږ ته د سپینو زرو اصل توب راښیي او ۹۲۵ شمېره هم د دې ښکارندویي کوي چې په دې ګوتې کې تر ۹۲.۵ سلنه پورې سپین زر کارول شوي دي، دا نښې موږ ته د سپینو زرو اصل توب را ښیي.
۲. د غږ په واسطه
دویمه لاره د سپینو زرو د اصل توب د پېژندلو لپاره د هغو غږ دی. کله چې موږ غواړو د سپینو زرو ګوتې، لاس بند او یا د هر بل شي اصل توب معلوم کړو باید دا سپین زر په زور سره په یوې اوسپنې ووهو، په یوې اوسپنې باندې د سپینو زرو په وهلو سره موږ ته دا څرګندېږي چې دا سپین زر اصل دي او که نه، ځکه چې اصل سپین زر چې کله پر اوسپنې ووهل شي غږ یې اوږد او دروند وي او ان تر دوو ثانیو دوام کوي، خو د اوسپنې او نورو عادي شیانو غږ لنډ او سپک وي.
۳. د اهنربا په واسطه
اصل زېورات لکه سره زر او سپین زر په اهنربا نه سریښېږي، کله چې غواړئ د سپینو زرو اصل توب څرګند کړئ باید هغه اهنربا ته نږدې کړئ که اهنربا ونیول نو باید پوه شئ چې دا سپین زر نه، کومه بله عادي اوسپنه ده.
۳. د یخک یا یخ په واسطه
د سپینو زرو یوه ځانګړنه دا ده چې د نورو اوسپنو په پرتله یې د تودوخې کچه لوړه ده، نو کله مو چې غوښتل د سپینو زرو اصل توب معلوم کړئ باید له یخک یا یخ څخه ګټه واخلئ، یوه ټوټه یخک واخلئ او پر سر یې د سپینو زرو ګوته، لاکت او داسې نور توکي کېږدئ که سپین زر اصل وي نو ډېر ژر به دا یخک په اوبو بدل شي او که اصل نه وي نو په ډېرې اوږدې مودې کې به دا یخک اوبه شي.
۴. د سپینونکي یا وایټکس په واسطه
د سپینو زرو د معلومولو لپاره تر ټولو اسانه لاره دا ده چې پرې وایټکس واچوئ، که سپین زر وي خو په خپل حالت به پاتې شي او که اوسپنه یا کوم بل څه وي، نو رنګ به یې تور شي.
۵. د بوی په واسطه
کله مو چې غوښتل د سپینو زرو اصل توب څرګند کړئ باید هغه بوی کړئ، سپین زر کوم ځانګړی بوی نه لري، خو هغه شیان چې د سپینو زرو په شان له عادي اوسپنې څخه جوړ شوي وي، بیا یو ډول بوی لري، نو کله مو چې د خپلې ګوتې، غوږوالۍ، لاکت او داسې نورو بوی احساس کړ پوه شئ چې دا سپین زر نه، بلکې کومه عادي اوسپنه ده.
۶. له یوه مسلکي کس څخه مرسته وغواړئ!
که ټولې یادې شوې کړنې مو تر سره کړې، خو بیا هم پوه نه شوئ چې دا سپین زر اصل دي او که نه، نو اوس باید له یوه داسې کس څخه مرسته وغواړئ چې د سپینو زرو له جوړولو او پېژندلو سره بلد وي. هغه کس د سپینو زرو د اصل والي په برخه کې درسره مرسته کولای شي.
پر دې سربېره داسې نورې کړنې هم شته چې موږ یې په ترسره کولو سره کولای شو د سپینو زرو په اصل توب پوه شو، خو تر ټولو اسانه او غوره لارې همدا دي چې پورته مو په لیکنې کې یادې کړې. هیله ده چې دا لیکنه د ټولو لوستونکو لپاره ګټوره او په زړه پورې وي!
لیکنه: شکېبا نادري