لیکنه ـ ریاض مقامزی
د نړیوالو ادبیاتو په فهرست کې د "الیوت" نوم هم خورا روښانه دی. موږ پدې لیکنه کې تاسو د الیوت د پېژندنې، آثارو او ویناوو په اړه معلومات درکوو. د لیکنې تر پایه به یې په ښه شکل وپېژنئ.
د الیوت لنډ ژوندلیک
د نړېوالو او په ځانګړې توګه د انګلېسي ادبیاتو ددې نامتو کره کتونکي او ليکوال پوره نوم توماس الیوت "T.S Eliot" دی. نوموړی په "۱۸۸۸ز" کال کې د امریکا په متحده ایالاتو کې وزېږېد. کورنۍ یې شتمنه وه؛ پلار یې سوداګر او مور یې هم یوه لوستې مېرمن وه. اليوت د خپلو همعصرو نورو لیکوالو په پرته ډېرې زدکړې کړې وې. په سمېت اکاډمۍ، هارډوارډ، اکسفورډ او سوربن پوهنتونونو کې د دوکتورا تر کچې لوړې زدکړې وکړې. د خپل ژوند په اوږدو کې یې بېلابېل مهم ادبي آثارو وپنځول، تر دې چې په شپېته کلنۍ کې یې د ادبیاتو د نوبل جايزه هم ترلاسه کړه. مهم آثار یې عبارت دي له: ویجاړ وطن، د یوې عیسوۍ ټولنې فکر، یو مجهول مدیر، جنایت په کلیسا کې، د پردیو خدایانو په لټه کې، د کره کتنې پولې او ځينې نور ... له بریالي ادبي ژوند وروسته په "۱۹۶۵ز" کال کې ومړ. د نوموړي له وصیت سره سم یې مړی وسوځول شو. د مرګ علت تر ډېره د سیګرټو څکول او د لندن ناپاکه هوا بلل کېږي.
نور مهم معلومات
• پنځه ويشت کلن و، چې انګلستان ته ولاړ او د هماغه ځای تابعیت یې واخست. همدارنګه خپل مذهب یې هم بدل کړ.
• په انګلېسي، فرانسوي، لاتیني او يوناني ژبو برلاسی و.
• یو ځل ورته هارډوارډ پوهنتون د استادۍ وړاندیز وکړ؛ خو ویې نه مانه.
• شاعري او کره کتنه د نوموړي د ادبي هڅو مهم ډګرونه بلل کېږي.
ویناوې
- د ژوند تېرېدلو دا را وښودل، چې انسان اکثرا هغه څيزونه له لاسه ورکوي، چې له شتون څخه یې ډاډمن وي.
- مينه غلې وي.
- تشويش او خفګان د نوښت محصول وي.
- هر څوک استعداد لري؛ خو په ډېرو حالاتو کې یوازې د څو دقیقو لپاره.
- انسان ډېره رښتيا نه شي زغملای.
- دنیا ته ټول رښتني راځي؛ خو ټول بېرته رښتيني نه ځي.