په اختر کې دې څلورو ټکو ته حتماً پام وکړئ!

په اخترونو کې اکثره ددې مهمو مسایلو په برخه کې بې غوره وي او په دې توګه خپل ځان او یا هم نورو ته تاوان رسوي. تاسو د يوه لوستي انسان په توګه باید دې ټکو ته جدي پام وکړئ!

• خپلې ټولې پيسې مه مصرفوئ!
تاسو به هم لیدلې وي چې ځينې وګړي او په ځانګړي توګه ځوانان په اخترونو کې نهايي ډېر مصارف کوي او پدې توګه وروسته له اقتصادي مشکلاتو سره مخ کېږي او خپل ځان ته زیان رسوي؛ نو تاسو هېڅکله بې ځايه مصارف مکوئ او وروسته له اختره ژوند له یاده مه باسئ! 

• د خوړو په برخه کې احتیاط وکړئ!
په اختر کې د خوړو پرېماني ددې سبب کېږي، چې ځینې وګړي له اندازې ډېر خواره وخوري. دا کار ډېر غیر مناسب دی او د صحت د خرابېدو سبب کېږي. په ځانګړې توګه د ډېرې غوښې خوړل جدي روغتيايي ستونزې جوړولای شي. همدارنګه هڅه مکوئ چې پر مېلمنو په زوره ډېر خواړه وخورئ دا کار هم بې نزاکتي بلل کېږي او هم کېدای شي د يو بل کس روغتيا ته زیان ورسوي. 

• سرعت ته پام کوئ!
موږ او تاسو وینو چې ډېری ځوانان په اخترونو کې موټرې په ډېر سرعت سره چلوي. خو که له ملګرو او خپلوانو سره په چکر ځئ؛ باید ډېر پام وکړئ چې چټک لاړ نه شئ. ځکه چې دا کار ستاسو د ژوند په بیه تمامېدلی شي. خدای مکړه اختر مو پر ځان او کورنۍ په غم بدل نکړئ. همدارنګه که نور ملګري مو چټک ځي باید منع يې کړئ او پدې توګه هم ځان او هم نورو ته خیر ورسوئ. 

• صدقه مه هېروئ
 که څه هم صدقه په هر وخت کې ښه وي؛ خو په اختر کې دا کار پر ځان لازم کړئ. شاید ستاسو کمه اندازه مرسته د یوې کورنۍ ورځ بدله کړي او پر شونډو يې مسکا راولي. مه هېروئ چې صدقه هېڅکله ستاسو په دولت کې کمی نه راولي بلکې برعکس څو چنده ډېروالی راولي.