د نولس کلنو نړیوال جام په منځلوبو کې د افغانستان کرکټ ملي لوبډلي له سرې لنکا لوبه وګټله او نیمه پایلوبې ته یې لار پیدا کړه.دا هغه لوبډله ده چې تر وروستۍ شیبو یې ویزې نه ورکولې، ویسټ انډیز ته په ځنډ لاړل. تمرینونه یې ګډوډ شول، د لومړي لوبې نېټه یې وخنډیډه خو دا دی بیا هم نن تر نیمه پایلوبې ورسېدل.
افغانستان کې له عادي وګړو نیولې بیا تر دغسې نړیوالو ستورو پورې د هر چا مخ کې د نورې نړۍ د خلکو په نسبت خنډونه ډیر وي. موږ باید په تاوان کې هم ګټه زده کړو. په موږ کې صبر او مقاومت پوخ دی، خو تدبیري حوصلې ته مو خُلق تنګیږي. دا لوبه هیواد کې د بحراني حالت له امله بې حوصلې او زړه تنګو خلکو ته هم ځآنګړی پیغام لري. که لا لرې هم د رڼا څرک نه ښکاري تاسې مه کينئ! خپل کار کوئ او لار وهئ...ښې ورځې به حتمي راځي.
که افغانستان دا نړیوال جام وګټي نو په لوبډلې به ټولې نړیوالې رسنۍ ورماتې شي. په هر اخبار، هر تلویزیون او هرې راډيو کې به د افغانستان د بریا خبرونه وي. ټول انټرنیټ به د افغانستان د نړیوال جام بریا ونیسي. زه باوري یم که موږ نړیوال جام ګټو د افغانستان ملي لوبډلې په بریا به فلمونه جوړ شي. د افغانستان سیاسي تحولات، د ویزو ځنډ او بیا هم نړیوال جام ګټل له معجزې کمه نه ده. تاسې ته ممکن د جام ګټل سخت ښکاري خو اوس د افغان لوبډلې مورال ډیر قوي شو او راټینګیدل یې سخت دي.
که لوبه مو نه وي ليدلي، په لاندې لینک کې یې اتو دقیقو کې وګورئ!
