ايکس کروموسوم
انتخاب پردے حق
انتخاب ـ پردے حق ( د چاپ کال ۲۰۲۵) نن په يونيورسټۍ کښې ننګيال د خپلي پي ايچ ډي د مقالې دفاع کوله . د ننګيال د مقالے عنوان د ماشومانو په پيدائش کښې د ايکس او وائي کروموسوم په کردار بحث کول وو- ننګيال چي خپله مقاله واوروله نو هغه د پي اېچ ډي مشر ازمېښت اخستونکي د هغه نه په دغه اړه مختلف سوالونه اوکړل - ننګيال د ټولو سوالونو په ډيره ښه طريقه جوابونه ورکړل . وروسته هال کښې موجود ټولو ګډون والو هم د ننګيال نه د هغه د پي اېچ ډي په حقله بېلا بېل تپوسونه وکړل د کومي چي ننګيال په ډيره ښه طريقه دفاع وکړه ـ دغه سوالونو کښې يو دا سوال هم وو چي د هلک او جينۍ پيدائش د مور او پلار د کوم کروموسوم د وجي کيږې ؟ ننګيال په جواب کښې اووے چي د هلک او جينۍ په پيدائش کښې په هر صورت کښې د مور له اړخه ايکس کروموسوم وي او د پلار د اړخه يا خو ايکس کروموسوم وي او يا وائي . اوس که جينۍ پيدا کيږي نوهغه د پلار د ايکس کروموسوم له وجي کيږي او که هلک وي نو د پلار د اړخه په هغې کښې وائي کروموسوم شامل وي. د ننګيال د دغه جواب په اوريدو د هغه د پي ايچ ډي مشر ازمېښت اخستونکي ننګيال ته دهغه د مقالے په کاميابه دفاع مبارکي ورکړه . او ننګيال ډاکټر شو د پي اېچ ډي کولو نه پس ننګيال ته په يونيورسټۍ کښې د اسسټنټ پروفيسر نوکري ميلاؤ شوه. د نوکرۍ مېلاوېدو نه پس د ننګيال واده وشو ـ او بيا هغه ورځ هم راغله چې د ننګيال زوې پېدا شو ـ ننګيال د زوي په زېږون ډېر خوشحاله وو ـ د ژوند ورځي شپې ئې ښه په خوشحالۍ تېرېدې خو بيا چې د ننګيال په کور کښې لور پېدا شوه د لور په زېږون ننګيال ډېر خوشحاله نه وو هغه غوښته چې نارينه اولاد يې وشي ـ ورځي شپې تېرېدې او بيا دوه کاله پس چي کله د ننګيال دويمه لور اوشوه نو دا ځل دومره خفه شو چي د خپلي ښځي سره ئي خبري هم بندي کړې په دې وجه چي لور ئي شوې وه . ښځې ورته ډير اووئيل چي ستا زما سره ولي ورانه ده په دے کښې زما څه قصور دے خو ننګيال چرته منله . او هر وخت به ئې ښځي له پېغور ورکولو ـ د ژوند ورځي شپې تيريدے او د ننګيال به هر وخت د ښځي سره جګړه وه تر دې پوري چې ننګيال ځان له دوېم واده هم اوکړو په دے غرض چي نارينه اولاد مې اوشي خو ددوېمي ښځي نه هم د ننګيال دوه لوڼه اوشوې.اوس د ننګيال دخپلې اولنۍ ښځي سره سره د دوېمي ښځې سره هم ورانه شوه. د نارينه اولاد د پيدائيش په سوچونواوکشمکش کښې د ننګيال د ژوند زياته برخه تېره شوي وه اوس ئې زوے هم زلمے شوے وه دا ځل خوشحاله وو په دے هيله چې نمسي به يې وشي ځکه يې زوي له هم د سبق دوران کښې واده وکړو. ډېر خوشحاله وو چي اوس به مې د خېره نمسي اوشي .خو د قدرت کارونو ته ګوره د واده نه پس د ننګيال زوے د پلار نه بيل شو ځکه چي د هغه هم اولنۍ لور شوي وه او پلار به ورته هر وخت پيغور ورکوؤ چې لور دې شته او زوے دې نيشتهد زوي د بيلتون نه پس ننګيال بيمار شو اوس به د هغه خيال دهغه مشري لور ګل څانګې ساتلو کومه چي په ميډيکل کالج کښې د ايم بي بي ايس د څلورم کال زده کوؤنکې وه . نن ګل څانګې د پلار نه تپوس اوکړو چي بابا په کومه خبره چي ستا زما دمور سره ورانه ده هغه خو ستاسو د پي اېچ ډي مقاله وه او تاسو ثابته کړې هم وه چي دا ټول کمال د پلار په کروموسوم کښې وي نو بيا تا زما د مور سره دا دومره موده په څه ورانه وه ؟ د ننګيال سره جواب نه وو او د شرمه نه ئي دا هم نه شو وېئلے چې ګنې دا د پلار دکروموسوم وجه نه ده ځکه چې يو خوا د هغه لور هم پوهيده ځکه چې پخپله ئي په ميډيکل کالج کښې سبق وئيلو او بل خوا ننګيال ته هم پته وه چي دا خو ټوله د وائي کروموسوم وجه ده کوم چي په پلار کښې وي. د ننګيال په سترګو کښې غټې غټې اوښکي وې ځکه چې نن دهغه خدمت ايکس کروموسوم کولو . يعني د هغه لور د هغه خدمت ته ولاړه وه د يو سوړ اسويلي نه پس ئي په ژړا کښې ئي خپلي لور ته اووې چي مور ته دي اووايه چې بابا معافي غواړي.ځکه چي د ثبوت باوجود ما د هغه سائنس نه انکار کولو د کومې په تحقيق چي ماته د ډاکټرۍ ډګري مېلاؤ شوې وه .
🌷 🌷 🌷
