د کتاب اخیستلو پر مهال باید کوم ټکي په پام کې ونيسو!؟
2,589
Riaz Muqamzai - ریاض مقامزی
2021-01-13 05:35:03
لیکنه ـ ریاض مقامزی
که تاسو هم له مطالعې سره علاقه لرئ او یا هم هره ورځ مطالعه کوئ، نو حتما به د کتاب اخيستلو پر مهال له ځينو پوښتنو سره مخ شوي یئ. مثلا: کوم کتاب واخلم؟ چېرته یې واخلم او ورته نورې پوښتنې به مو ذهن ته درغلي وي. دا ډېره ښه خبره ده او باید یادې پوښتنې ځواب شي.
په دې وروستيو کې اکثره خلک شکايت کوي، چې له کتاب اخيستلو وروسته پښېمانه شوي دي، او پر خپلو پیسو خفه دي، ځکه چې کتاب یې په زړه نه وي.
که څه هم هر کس ته د مناسب کتاب معيار فرق کوي، مګر بیا هم ځينې ګډې ځانګړنې شته، چې له موږ سره په کتاب اخيستلو کې مرسته کوي. موږ په دې لیکنه کې هڅه کړې، چې تاسو ته ځينې لارښوونې وکړو، تر څو په کتاب اخيستلو پښېمانه نه شئ.
کوم کتاب واخلم؟
تر هر څه لومړی باید پر دې پوه شئ، چې غواړئ کوم کتاب واخلئ. په دې برخه کې ډېر وړانديزونه نه شي کېدای، خو موږ بیا هم ځينې لارښوونې درته لرو.
لومړی ـ تاسو باید لومړی پر خپل مسلک برلاسي شئ. که تاسو د پوهنتون زده کړيال یئ نو زموږ توصیه دا ده، چې لومړی باید د خپل مسلک اړوند کتابونه وپېرئ او ویې لولئ. ځکه چې ټولنه له تاسو یوه توقع لري، چې هغه ستاسو مسلک دی. تر هر څه لومړی باید پر خپلې رشتې برلاسي شئ، وروسته کولای شئ عمومي کتابونه مطالعه کړئ.
دویم ـ که د مکتب دورې زده کوونکي یئ او یا هم د مطالعې ذوق لرئ. نو د خپل ذوق سره سم کتاب واخلئ. د بېلګې په توګه که له ادبیاتو سره مينه لرئ نو ادبي کتابونه ولولئ او که ساینس مو خوښ وي، ساينسي کتابونه انتخاب کړئ. ددې کار ګټه دا ده، چې د خپل ذوق اړوند مطالعه مفیده وي او له مطالعې نه ستړي کېږئ.
ولې کتاب واخلم؟
اوس نو باید له ځانه وپوښتئ، چې کتاب ولې اخلئ؟ تاسو ته به دا پوښتنه عجيبه ښکاري او په ډېرې اسانۍ به ووايئ، چې د مطالعې لپاره یې اخلم. ستاسو ځواب سم دی؛ مګر زموږ موخه بدله ده.
موږ وايو که تاسو کتاب اخلئ، نو لومړی یې له خپلو ملګرو سره وګورئ. ممکن ستاسو ملګری همدغه کتاب ولري، چې تاسو یې د اخيستلو نيت لرئ. یا هم کېدای شي په آنلاین بڼه په ځينو ویبسايټونو کې یاد کتاب پيدا کړئ. که تاسو همدغه کتاب له ملګرو او یا هم په PDF بڼه پيدا کړئ نو ډېر بختور یئ. کتاب ولولئ او وګورئ چې څومره اغېزمن دی. که کتاب ښه و، او تاسو ترې متأثره شوئ نو کولای شئ بیا یې ځانته هم واخلئ او که برعکس ګټور نه و، نو له بې ځايه اخيستلو به خلاص شئ. په دې توګه به له بې ځايه لګښت څخه هم وژغورل شئ.
له ملګرو مشورې واخلئ!
ددې ترڅنک تاسو کولای شئ له ملګرو مشورې واخلئ. له ملګرو وپوښتئ چې تاسو ته د کوم کتاب لوستلو توصيه کوي. خو که د کوم کتاب نوم تاسو ته واخيستل شي، يوازې پر دې بسنه مه کوئ. بیا ترې وپوښتئ، چې ولې یې تاسو ته توصيه کوي؟ همدارنګه د کتاب په اړه د توصيه کوونکي تأثر هم وپوښتئ.
ېه دې کار سره به تاسو لږ و ډېر معلومات د کتاب په اړه حاصل کړئ. نو د اخيستلو او نه اخيستلو پرېکړه یې په اسانۍ سره کولای شئ.
څو پاڼې یې ولولئ
کله چې تاسو کتاب په نښه کړه، نو اړ یئ، چې کتابخانې ته ورشئ او کتاب وپېرئ. اکثره خلک په کتابخانه کې یوازې کتاب را اخلي او پیسې ورکوي. دا کار ناسم دی.
کله چې د خپلې خوښې کتاب مو پيدا کړ، نو ژر ـ ژر یې فهرست وګورئ. او ځينې موضوعات یې وګورئ. تر څو پوه شئ چې کتاب د څه په اړه بحث لري، په دې توګه به تاسو وکولای شئ د کتاب په اړه یو څه پوه شئ. نو بیا به یې په اخيستلو پښېمانه نه شئ. همدارنګه کوښښ وکړئ، د کتاب د نرخ په اړه هم وپوښتئ، چې څوک یې قیمت درباندې خرڅ نه کړي.
که غواړئ چې د پښتو، دری - فارسي او انګلېسي ژبې وړيا پي.ډي.ايف کتابونه ترلاسه کړئ، نو په دې لينک (/https://ketabton.com) ګوته کېکاږئ! او له ديارلس زرو پورته وړيا کتابونه ترلاسه کړئ.
