ژباړه ـ ریاض مقامزی
امریکا د نړۍ له ځواکمنو هېوادونو څخه ده. ددې هېواد قوي اقتصاد، پوځ او سیاست ددې سبب شوی، چې په نړيواله کچه یو له اغېزناکو هېوادونو څخه وشمېرل شي. له همدې کبله یې ولسمشر هم د ځانګړي قدرت خاوند وي. تاسو به په دې لیکنه کې د همدې هېواد د ولسمشر "جوبايډن" په اړه هر اړخيز معلومات ولولئ.
جوبایډن څوک دی؟
د امریکا د اوسني ولمسشر بشپړ نوم "جوزف رابینت بایډن جونیور" دی. خو تر ډېره د "جوبایډن" په نوم پېژندل کېږي. نوموړی د "۱۹۴۲" زیږديز کال د نومبر په شلمه نېټه وزېږېد. د زېږېدو ځای یې د پنسلوانيا ایالت، اسکرانتون ښار دی. باید یادونه وکړو، چې هغه د خپلې کورنۍ مشر اولاد دی. که څه هم د بایډن پلار شتمن و؛ خو د نوموړي د زېږېدنې په وخت کې له یو لړ اقتصادي ستونزو سره مخ و. نو ځکه یې کورنۍ تر یوه وخته له نيکه سره اوسېده. په لس کلنۍ کې یې کورنۍ یوه اپارتمان ته کډه شوه او هلته یې ژوند غوره کړ، خو څه موده وروسته یې خپل کور هم واخیست. د کورنۍ مالي وضعيت یې ښه شو او پلار یې د کارول شوو ماشینونو یو ښه سوداګر شو.
بایډن د زده کړو پر مهال چندان لایق نه و، آن په ښوونځي کې یو ځل ناکام شوی هم دی. مګر بیا یې هم لوړې زده کړې ترسره کړي دي. د ښوونځي له دورې وروسته یې د دلاویر پوهنتون څخه دوه ديپلومونه د "تاریخ او سیاسي علومو" په برخه کې ترلاسه کړل. ورپسې یې په سیراکیوز پوهنتون کې حقوق ولوستل.
کورنۍ
بایډن په "۱۹۶۶ز" کال کې چې لا څلورويشت کلن و له نیلیا هانتر سره واده وکړ. دا هغه وخت و، چې نوموړي لا خپل تحصیلات نه وو بشپړ کړي. وروسته یې درې اولاونه وشول، چې جوزف بایډن، رابرټ هانتر او نائومي کریستينا نومېږي. په ترتیب سره یې د زېږېدو کلونه "۱۹۶۹، ۱۹۷۰ او ۱۹۷۱ز" دي.
په "۱۹۷۲ز" کال کې د بایډن مېرمنه د کریسمیس سودا لپاره له خپلو اولادونو سره ښار ته تلله، چې ګاډي یې ټکر وکړ. د بایډن مېرمنه او یوه کلنه لور یې مړه شول او دوه نور ماشومان یې ټپيان شول. آن مشر زوی یې څو کاله د معیوبینو په بایسکل کې ګرځېده.
له دې پېښې وروسته جوبایډن پنځه کاله یوازې ژوند وکړ او د خپلو اولادونو پالنه یې کوله. خو په "۱۹۷۵ز" کې له جیل ټریسي سره اشنا شو. دوی د "۱۹۷۷ز" کال د جون په اولسمه نېټه ګډ ژوند پیل کړ. له دې مېرمنې څخه یوازې یوه لور لري، چې اشلي بلیزر نومېږي. دا نجلۍ په "۱۹۸۱ز" کې زېږېدلې ده.
د جوبایډن دویم زوی "رابرت هانتر" یو وکیل دی. لومړی زوی یې چې قاضي و، د عراق په جګړه کې هم ګډون درلود. د "۲۰۱۵ز" کال د می په دېرشمه نېټه د مغزو د سرطان له کبله ومړ. باید یادونه وکړم، چې په دې وخت کې یې عمر "۴۶" کاله و.
نور په زړه پورې معلومات
- جوبایډن یو له هغو سیاسي څېرو څخه دی، چې له "۳۱" کلنۍ وړاندې یې سنا مجلس ته لاره موندلې ده. په دې توګه هغه د امریکا په تاریخ کې شپږم ځوان سناتور دی. بایډن په "۳۰" کلنۍ کې د سنا مجلس غړی شو.
- په دې وخت کې د نوموړي روحي حالت ښه نه و. ځکه بایډن اړ و چې هم مهاله د سنا مجلس کارونه او د خپلو اولادونو روزنه ترسره کړي.
- بايډن ته اجازه ورکړل شوې وه، چې د اولادونو د اړتيا پر وخت کولای شي مجلس ته حاضر نه شي. همدارنګه هغه به د مېرمنې او لور د مړینې په ورځ سنا مجلس ته نه حاضرېده او دا ورځ یې د هغوی په یاد کې تېروله.
- په "۱۹۷۴ز" کې ټايم مجلې "بایډن" په هغه لیست کې ځای کړی و، چې په راتلونکي کې به مشهورې څېرې شي او دا وړاندوینه یې له واقعیته لرې نه وه.
- بایډن اووه ځلې د "۱۹۷۲، ۱۹۷۸، ۱۹۸۴، ۱۹۹۰، ۱۹۹۶، ۲۰۰۲، ۲۰۰۸ز" کلونو په ټاکنو کې بریالی شو او ثنا مجلس ته یې لاره ومونده.
- د څو کالو راهیسې پر بایډن تور دی، چې نوموړی هڅه کوي مېرمنې لمس کړي. له همدې امله ورته د "لمس کوونکي سیاسمتدار" لقب ورکړل شوی. د داسې پېښو انځورونه هم شته؛ خو بایډن دا تور په کلکه ردوي.
