ګلابو - درېیمه برخه

ګلابو (ناول) - #درېیمه_برخه
لیکوال: نعمت الله رحیمي

غالب کتابچه ترې واخیسته خپل پر ځای کښیناست او شوکت یې پهٔ څټ ووهلو ویې ویل:
- ستا د لاسه یې دومره لیکچر راکړ

پوهنتون رخصت شو غالب کورته راغی…

کورته ورسید بې سلامه دننه شو مور یې وویل:
- عجیبه وخت شو، خلک سبق وايي عقل یې ډېر شي ستا خو ورځ پهٔ ورځ کمیږي
- ولې څهٔ مې کړي؟
- دې بوډۍ مور ته یو سلام نه اچوې
- ښه سلام! بس سيي شو؟

پهٔ غوصه خپلې خونې ته دننه شو، څو شیبې همداسې ناسته ؤ، کتابچه یې را واخیسته او لهٔ غوصې یې کتابچه څیرې کړله او پهٔ همدې غوصه کې خوب غلبه پرې وکړه ویده شو…

ګړۍ وروسته یې سترګې پرانیستې څو شیبې غلی ناست ؤ، یودم یې لهٔ ځانه سره وویل:
- آه دا ما څهٔ وکړل د بیچاره انجلۍ ټول نوټونه مې ورته برباد کړل

پهٔ همدې افسوس کې شپهٔ سبا شوه، پوهنتون ته روان شو وختي ورسیدو د پوهنتون پهٔ بڼ کې تر یوې ونې لاندې ناست ؤ شیبه وروسته هوسۍ پهٔ راغله د پوهنځي تعمیر ته دننه کیده چې غالب ور غږ کړ:
- وبښه! څو شیبې وخت راکولای شې
- څه! څه شوي؟
- یو وار راشه دلته کینه

هوسۍ ور روانه شوه، همداسې ولاړه وه غالب وویل:
- کینه
- نه کښیناستو ته وخت نهٔ لرم ژر ووایه هرڅه چې وایې

غالب پورته ور وکتل، هوسۍ باڼه لهٔ یو بل سره ور وستل غالب وویل:
- ستا د نوټونو کتابچه رانه ورکه شوې

هوسۍ څهٔ ونه ویل او همداسې روانه شوه، شیبه وروسته غالب هم ټولګي ته ورغی، ټولګي ته دننه شو…

پر خپل ځای ناست ؤ لا ټولګی تش ؤ ځینې محصلین نهٔ وو راغلي یوه انجلۍ دننه شوه او د غالب څنګ ته پر څوکۍ کښیناسته ویې ویل:
- زما نوم وړانګه دی، هغه اول قطار کې کینم
- ښه 
- امم! ما ویل چې ته خو پهٔ دې شیانو پوهیږې زما موبایل کې یوه ستونزه ده راته جوړ بهٔ یې نهٔ کړې

غالب د هوسۍ خواته ور وکتل ویې ویل:
- نه زهٔ نهٔ پرې پوهیږم

وړانګه لا ناسته چې شوکت راغی غالب وړانګې ته وویل:
- کهٔ زحمت نهٔ کیږي پر خپل ځای کینه دا زما د ملګري ځای دی

وړانګه خپل ځای ته ولاړه، شوکت کښیناست ویې ویل:
- اوه! یاره ستا مینوال خو ډېر زیات شوي
- غلی شه یاره
- ښهٔ خو څه یې ویل؟
- خودا موبایل کې یې څه ستونزه وه
- ښه خو څنګه شوه د کتابچې مشوره څهٔ ګټه یې وکړه

غالب پهٔ شوکت ور پورته شو ویې ویل:
- خاورې مشوره! زه به له تاسره ګورم

شوکت منډې کړل او غالب ورپسې ؤ، د پوهنتون بڼ کې دواړه ودریدل ستړي شول شوکت وویل:
- خیر خو ګوره یوه بله مشوره درکوم
- نهٔ یې غواړم ستا دا بیکاره مشورې
- ته خو غوږ شه باور وکړه دا بهٔ ګټه وکړي

غالب او شوکت دواړه کښیناستل شوکت وویل:
- داسې بهٔ وکړې چې هغې انجلۍ سره بهٔ اړیکې وساتې ارواه پوهنه وايي چې کومه انجلۍ درسره مینه لري او له بلې انجلۍ سره د وګوري نو اور پرې بلیږي کیدای شي داسې څهٔ نا څهٔ خو وشي، نور د خپل زړه…

لنډه شیبه وروسته غالب وویل:
- یعنې اوس ورشم موبایل یې جوړ کړم ورته او د ځان پهٔ خاطر د هغې زړه هم مات کړم؟
- نه زهٔ خو نهٔ وایم چې یاري ورسره وکړه، ملګرتیا ملګرتیا…

غالب پهٔ سوچ کې ډوب شو شیبه وروسته یې وویل:

- ریښتیا! فلمونو کې مې هم همداسې لیدلي
- نو زهٔ خو تاته خوشي مشوره نهٔ درکوم

غالب او شوکت د ټولګي په لور روان شول، غالب یې پر ځای کښیناست شوکت راغی ویې ویل:
- پاڅیږه! دلته څه کوې؟
- څه بهٔ کوم؟ ولې
- تراوسه مې څهٔ ویل درته ورشه ثواب وګټه
- ثواب؟
- هو! د انجلۍ موبایل ورته جوړ کړه

شوکت ټینګار وکړ غالب یې پهٔ زوره له خپل ځای پاڅولو د انجلۍ خواته ور روان شو ویې ویل:
- وبښه اغلې!

انجلۍ مخ ور واړؤ ویې ویل:
- مهرباني وکړه؟
- مخکې د ویل چې موبایل کې د څهٔ ستونزه ده مرسته وکړم؟

انجلۍ پهٔ غوصه وویل:
- د موبایل ستونزه بهٔ حل شي خو ستا نه، غرور دې کم کړه زما موبایل بهٔ جوړ شي

د درېیمې برخې پای!