د ژاولې ژوولو روغتيايي ګټې

ژباړه ـ ریاض مقامزی 

اکثریت خلک فکر کوي، چې  ژاولې د ماشومانو لپاره دي تر څو هغوی پرې غلي کړای شي، یا هم ځينې نور خلک د ژاولو ژوول بې ادبي ګڼي؛ خو څېړنو موندلې ده، چې ژاولې ژوول د انسان جسمي او ذهني روغتيا لپاره خورا ډېرې ګټې لري. ددې ګټو له ډلې یې ځينې په دې ډول دي.

لومړی| فشار ختموي

که په ستونزمنو حالاتو کې یئ او یا هم په داسې چاپېریال کې کار کوئ، چې ډېر ذهني فعالیت ته پکې اړتیا وي؛ نو حتما له ځان سره ژاولې ولرئ او ویې ژوئ. ددې کار ګټه دا ده، چې پر تاسو فشار ختمېږي او په کار کې مو له غلطۍ څخه ژغورل کېږئ. تاسو به هم ليدلي وي، چې د سخت فشار پر مهال نړېوال ورزشي لوبغاړي ژاولي ژوي، ترڅو فشار یې کنټرول وي او سمې پرېکړې وکړای شي. 

دویم| ذهني تمرکز قایموي 

یوویشتمه پېړۍ د انټرنیټ او ټیکنالوژۍ د اوج پېړۍ ده. په دې زمانه کې ډېری خلک د فزیکي کتابونو پر ځای په موبایل/کمپيوټر کې الکترونیک کتابونه لولي؛ خو دا چاره له ستونزو خالي نه ده. په دې معنا چې په انټرنیټ کې د مطالعه کولو پر مهال فکري تمرکز  ساتل اسانه کار نه دی؛ مګر له نېکه مرغه  څېړنو ښودلې ده، چې پر انټرنیټ/ویبسايټ د مقالو لوستلو پر مهال د ژاولو ژوول فکري تمرکز رامنځته کوي. نو که په الکټرونیکو وسایلو کې مطالعه کوئ، فیلم ګورئ او ... حتما ژاولې هم وژوئ. 

درېيم| د خولې وچېدو مخنیوی کوي

د خولې وچېدل یوه ناروغي ده، چې انسان پکې د خولې وچوالی حس کوي او هڅه کوي خپله خوله لمده وساتي. ددې ستونزې د حل لپاره روغتیاپالان د ژاولې ژوولو سپارښتنه هم کوي. کله چې ژاولې ژوئ نو دا چاره ستاسو په خوله کې موجودې غدې ترشحاتو ته هڅوي او په دې توګه ستونزه حلېږي. 

څلورم| د غاښونو پاکوالی، سپينېدل او سلامتیا

د ژاولو ژوول پر نورو ګټو سربېره له تاسو سره مرسته کوي، چې غاښونه مو پاک او سپين وساتي. کله چې د غاښونو پاکوالی موجود وي، نو له ناروغۍ څخه به هم په امان کې وي. د ژاولې په ژوولو سره د خوړو هغه ذرات چې په غاښونو کې بند وي، راوځي او حل کېږي. په دې توګه غاښونه له چینجني کېدو او ژېړېدو ژغورل کېږي، چې په پایله کې یې سلامتیا هم تضمینېږي. 

پنځم| د وزن کمښت

هغه ژاولې چې کم خواږه وي او یا اصلا خواږه نه لري ستاسو د وزن په کنټرول کې مرسته کوي. دا ځکه چې ژاوله یو ډول مړښت راولي او انسان له ډېر ډوډۍ خوړولو ګرځوي، چې په نتیجه کې د انسان وزن کمېږي.

که د وزن د کمولو په هڅه کې يئ؛ نو ژاولې وژوئ. په ځانګړې توګه روغتياپالان وړاندیز کوي، چې مازیګر مهال ژاولې وژوئ تر څو ژر یې ګټورې پایلې ووینئ. 

شپږم| د حافظې پیاوړتيا

وروستیو ترسره شوو څېړنو ښودلې ده، چې د ژاولو ژوول د نورو ګټو ترڅنګ د حافظې په پیاوړتيا کې هم ډېره مرسته کوي. که تاسو خپله او یا مو هم کوم ملګری د حافظې له کمزورۍ شکایت کوي؛ نو د یو انتخاب په توګه له ژاولو هم ګټه اخیستلای شي. البته روغتياپالان پر دوو دلایلو دا خبره کوي، لومړی دا چې ژاولې فکري تمرکز رامنځته کوي د تمرکز رامنځته کېدل د حافظې د پیاوړې کېدو په معنا ده، دویم دا چې د ژاولې په ژولو سره د وینې جریان د سر په برخه کې ښه کېږي، سر ته پوره وینه رسېږي او د حافظې د قوت سبب کېږي. 

اووم| په هضم کې مرسته کوي

که له ډوډۍ وروسته د ژاولو ژولو عادت لرئ، خوښ اوسئ. ځکه چې دا چاره په معده کې د اسیدونو د ترشح کېدو سبب کېږي او په دې توګه مو خوړلي خواړه ژر هضمېږي او په بدن کې جذبېږي. نو د یو هضم کوونکي فکټور په توګه هم کولای شئ له ژاولې ګټه واخلئ.