!له ګناه څخه د خلاصون لارې

ليکنه ـ شکېبا نادري،له ګناه څخه د خلاصون لارې!

الله د ځمکې پر مخ انسانان د یوې ځانګړې موخې لپاره پیدا کړي دي او څو څو ځله یې د انسان د خلقت موخه په قران کریم کې په ښکاره توګه بیان کړې او فرمایلي یې دي: {وما خلقت الجن و الانس الا لیعبدون} 

ژباړه: پېریان او انسانان مو نه دي خلق کړي، مګر د عبادت لپاره. د دې ایت په لیدو سره موږ ته معلومیږي چې د انسان د پیدایښت یوازینۍ موخه د اللهﷻ عبادت او بندګي ده، سره له دې ایتونو بیا هم ځینې انسانان ګناه کوي، څه وخت وروسته له خپلې ګناه پښېمانه کېږي، خو بیا هم د هغې ګناه څخه ځان نه شي ژغورلای.

موږ په دې لیکنې کې له ګناه څخه د خلاصون هغه لارې درښیو چې په ترسره کولو به یې إن شاء الله تاسو له ګناه کولو ځانونه وژغورئ.

 که غواړئ چې دنیا او اخرت مو جوړ شي او له ګناه کولو څخه ځان وژغورئ زموږ دا لیکنه ولولئ!

۱. د ګناه د پرېښودلو لپاره جدي او کلکه پرېکړه وکړئ!

که مو له کړې ګناه څخه پښېمانه یاست او نه غواړئ بیا دا ګناه تکرار کړئ، تر ټولو غوره لار یې دا ده چې  د ګناه د نه کولو لپاره یوه جدي او کلکه پرېکړه وکړئ او له ځان سره ژمنه وکړئ چې نور به دا ګناه نه کوئ، همدا پرېکړه د دې لامل کېدلای شي چې تاسو هم په دنیوي او هم په اخروي چارو کې بریالي او خوشبخته شئ.

۲. پر دې ایمان او باور درلودل چې اللهﷻ مو په هر ځای او هر وخت کې ټولې کړنې ویني

کله چې موږ پر دې ایمان او عقیده ولرو چې اللهﷻ په هر ځای او هر وخت زموږ ټولې کړنې ویني، نو یو بشپړ مسلمان هېڅکله بیا ګناه نه کوي او له ګناه څخه ځان لرې ساتي. 

۳. د ګناه د پایلو په اړه فکر کول

یو مسلمان هغه وخت کولای شي چې ځان له ګناه څخه خلاص کړي، چې د ګناه د ناوړو پایلو په اړه فکر وکړي د ګناه پایلې تل خطرناکې او ناوړه وي، کله چې یو مسلمان مخکې له ګناه د هغو د پایلو په اړه فکر وکړي هېڅکله بیا ګناه نه کوي. 

۴. د جنت او دوزخ ترمنځ پرتله 

هر مسلمان اړ دی چې د خپل اخروي ژوند په اړه څېړنه او مطالعه وکړي، نو کله چې یو کس د جنت او دوزخ په اړه معلومات پیدا کړي او دا دواړه ځایونه سره پرتله کړي، خپله به له ګناه څخه ځان خلاص کړي او نیکه لاره به ونیسي.

۵. پر دې باور کول چې نفس او شیطان د انسانانو دښمنان دي

په قران کریم کې څو ځله ویل شوي چې د انسان تر ټولو ښکاره دښمنان د هغه نفس او شیطان دي، نو کله چې یو مسلمان دا خبره ومني خپله به له شیطاني کړنو او ګناه څخه ځان خلاص کړي.

۶. د سبحان الله ډېر ویل

کله مو چې احساس وکړ چې داسې کړنه باید تر سره کړئ چې په کولو سره یې کېدای شي تاسو ګنهګار شئ، ژر له خپل ځای څخه جیګ شئ، اودس وکړئ او د اللهﷻ ذکر وکړئ.

له ګناه څخه د خلاصون لپاره تل  د بوخت اوسېدلو هڅه وکړئ. انسانان ډېری وخت شیطاني خبرې او ګناه هغه وخت کوي چې وزګار اوسي، نو ډېره بېکاري هم د دې لامل کېږي چې موږ ناسمې کړنې تر سره کړو.

لیکنه: شکېبا نادري