لیکنه: شکېبا نادري، د انار د پوستکي روغتیایي ګټې
انار هغه مېوه ده چې د مني په موسم کې پخېږي د مني پر مهال دا مېوه زموږ د ګران هېواد افغانستان په هر ولایت کې په ځانګړي توګه په کندهار او جلال اباد ولایتونو کې ډېره پیدا کېږي، چې هر څوک یې په اسانۍ او ارزانه بیه تر لاسه کولای شي، له بده مرغه چې ډېری خلک د انار پوستکی لرې غورځوي، خو که یې له روغتیایي ګټو خبر شئ، نو هېڅکله به دا کړنه تر سره نه کړئ.
موږ په نننۍ لیکنه کې د انارو د پوستکو په اړه تاسو ته معلومات در کوو هیله ده چې لیکنه تر پایله ولولئ!
۱. د ستوني د درد د درملنې لپاره
د ستوني درد هغه ناروغي ده چې ډېری کسان پرې اخته کېږي، که تاسو هم همدا ناروغي لرئ تر ټولو اسانه او کورنۍ درملنه یې د انار پوستکی دی، د انار پوستکی په لږو اوبو کې واچوئ او جوش یې کړئ، په ورځ کې یې درې ځلې غړغړه کړئ ډېر ژر به مو د ستوني درد جوړ شي.
۲. د شکر د ټپ د درملنې لپاره
شکر هغه ناروغي ده چې ټپ یې په اسانۍ نه جوړېږي، خو د دغه ټپ د جوړېدو تر ټولو غوره لار د انار له پوستکي څخه ګټه اخیستل دي، لومړی د انار پوستکی وچ کړئ، وټکوئ او بیا یې په ټپ واچوئ ډېر ژر به مو ټپ جوړ شي.
۳. د اسهال د درملنې لپاره
اسهال هغه ناروغي ده چې په لږ وخت کې ناروغ کس ډېر کمزوری کوي، ځکه چې ناروغ په چټکۍ سره د خپل بدن اوبه له لاسه ورکوي، نو هر څومره ژر چې کېږي باید مخه یې ونیسو، تر ټولو اسانه لار یې د انار پوستکی دی، لومړی د انار پوستکی جوش کړئ او بیا یې اوبه وڅښئ، نو ډېر ژر به جوړ شئ.
۴. د پوستکي د ښکلا او نرم والي لپاره
د انار پوستکی وټکوئ پوډر یې له کریم یا واسیلین سره ګډ کړئ او هره ورځ ترې ګټه واخلئ، په ورځ کې یو ځل مو مخ او لاسونه پرې غوړ کړئ او وروسته له لسو دقیقو یې ووینځئ، د دې کړنې په تر سره کولو سره به مو پوستکی نرم او ښایسته شي.
۵. د غاښ د درد د درملنې لپاره
د غاښ درد هم هغه ناروغي ده چې د درد زغمل یې ستونزمن کار دی تر ټولو اسانه لار یې دا ده چې پرې د انار پوستکی واچوئ، د انار پوستکی لومړی وچ کړی، وروسته یې وټکوئ او په هغه غاښ چې درد کوي دا د انار د پوستکي پوډر واچوئ.
۶. د خولې د ټپ د درملنې لپاره
د ډېری کسانو په خولې کې یو ډول سپینې پولی د ټپ په بڼه پیدا کېږي چې ډېر درد او سوی لري که تاسو هم دا ناروغي لرئ د انار له پوستکي څخه ګټه واخلئ، لومړی د انار پوستکی جوش کړئ، دوه یا درې ځله مو په ورځ کې خوله پرې ووینځئ.
سربېره پردې د انار پوستکی ګڼ شمېر نورې روغتیایي ګټې هم لري، چې د ټولو یادونه دلته ناشونی کار دی.