لیکنه ـ ریاض مقامزی
حکايت دی، چې د اور وژنې ادارې دوه کار کوونکي ځنګله ته ولاړل، ترڅو اور مړ کړي. اور یې مړ کړ. دا یو لوګيو تک تور کړی و او بل پاک سوتره و. کله چې له ځنګله را ووتل او د سیند خوا ته نږدې شول. نو یو بل ته یې وکتل، تر څو وويني چې ځانونه پرېمنځي که نا. پاک کس چې تور شوي کس ته وکتل، فکر یې وکړ، چې دی به هم خیرن شوی وي. نو ځان یې پرېمنځه؛ خو چټل شوي کس چې مقابل لوری پاک ولید نو په زړه کې ور تېره شوه چې ځان پرېمنځلو ته به اړتیا نه وي؛ نو همداسې ناپاک کور ته ستون شو.
د حکایت درسونه
پورتنی حکایت د درسونو یوه ښه ټولګه ده. که ژور فکر وکړو، نو پوه به شو چې څومره ښه پیغام راکوي. ځينې درسونه یې پدې ډول دي:
• تل د نورو له نظره ځان مه تلئ. پخپله خپل ځان ووینئ او پوه شئ، چې څومره ښه/بد یئ.
• د نورو صفت/غیبت ستاسو په ښه والي/بدوالي دلالت نه شي کولی؛ بلکې یوازې ستاسو وجدان دا قضاوت کولای شي.
• که له ښو خلکو سره یئ، ممکن ځان ته په ښه نظر وګورئ؛ خو داسې نده. تل ځان ته یو ځل له خپله اړخه وګورئ.
• که ښه او آسوده ژوند لرئ؛ نو یو ځل پخپلو شتمنیو هم فکر وکړئ، چې له کوم درک مو ترلاسه کړي دي.
• په اونۍ، میاشت او کال کې حتما د تېر وخت کړنې، فعالیتونه او خویونه مو نقد کړئ او خپلې غلطیانې، کمزورۍ او ګناهونه جبران کړئ.
• ژر قضاوت مه کوئ.
• د هرې موضوع په اړه دقیق معلومات وکړئ او بیا پرېکړه کوئ.
• له نورو سره ځان مه پرتله کوئ.
• خپل وورځنيو کارونو/فعالیتونو ته د شک په نظر وګورئ. آيا ستاسو په درد خوري؟ وخت خو به مو نه ضایع کوئ او ...؟ نورې ګڼې پوښتنې مو ځواب کړئ.
