لیکنه: شکېبا نادري
ایا د اومېندوارۍ پر مهال د ترخو خوړو خوړل د ماشوم لپاره زیان لري؟
اومېندواري د ښځو د ژوند ستونزمن خو په ورته وخت کې یو په زړه پوری پړاو دی. هره ښځه په خپل زړه کې د مور کېدلو هیله لري او غواړي چې خپل خاوند او کورنۍ ته یو وراث وزېږوي او په خپل ژوند کې یو مثبت بدلون راولي.
د اومېندوارۍ پر مهال د ښځو په رویه، حالت، خوی او ان خبرو کې بېلابېل بدلونونه رامنځته کېږي، چې د کورنۍ نور غړي په ځانګړي توګه خاوند یې باید د خپلې مېرمنې دغه حالت وزغمي.
د اومېندوارۍ پر مهال د ځینو ښځو زړه غواړي چې ترخه خواړه وخوري، خو د خلکو په اند ترخه خواړه پر ماشوم منفي اغېزه کوي.
موږ په نننۍ لیکنه کې تاسو ته په دې اړه معلومات درکوو چې ایا د اومېندوارۍ پر مهال د ترخو خوړو خوراک د ماشوم لپاره زیان لري او کنه؟
که تاسو هم غواړئ په دې اړه پوه شئ زموږ لیکنه تر پایه ولولئ!
څېړنو څرګنده کړې ده چې د ترخو خوړو خوراک د ماشوم لپاره هېڅ زیان نه لري، خو اومېندواره مېرمن له بېلابېلو ستونزو، لکه د معدې سوځېدل، د خوړو نه هضمېدل او دې ته ورته ستونزو سره مخ کولای شي، ځکه د اومېندوارې مېرمنې بدن د بدلون په حالت کې دی، نو باید د ترخو خوړو له خوراک سره پام وشي او لږ وخوړل شي. کېدای شي په لومړیو درېیو میاشتو کې د ترخو خوړو خوړل پر تاسو کومه منفي اغېزه ونه کړي، خو هغه اومېندوارې مېرمنې چې کانګې کوي د ترخو خوړو خوړل ورته ستونزمن دي، ځکه ترخه خواړه مو د یاد حالت د لا خرابېدلو لامل کېږي.
له درېیمې میاشتې وروسته د ماشوم د لویېدلو له امله اومېندواره مېرمن نه شي کولای په سمه توګه خوراک وکړي، ځکه د رحم لویېدل د معدې د کوچینوالي لامل کېږي، نو په داسې حال کې باید اومېندواره مېرمن داسې څه ونه خوري چې د معدې د درد او سوځېدو لامل یې شي یعنې د ترخو خوړو له خوراک څخه باید ډډه وکړي.
د معدې سوځېدل په ټولو انسانانو په ځانګړې توګه په اومېندوارو مېرمنو کې ډېر دي، ترخه خواړه د دې لامل کېږي چې د معدې سوځېدل مو څو برابره شي، نو که غواړئ چې د معدې د سوځېدو مخنیوی مو وکړئ له ترخو، غوړو، سره شویو خوړو، قهوې، اسیدي او ګازداره څښاکونو او خوږو شیانو له خوړلو څخه ځان لري وساتئ.
سربېره پر دې د معدې ډېر ډکول مو هم د معدې د سوځېدو لامل کېږي، خو د دغه حالت د مخنیوي لپاره اومېندواره مېرمن باید ډېرې اوبه وڅښي.
د اومېندوارې مېرمنې د معدې د سوځېدو د مخنیوي بله اسانه لار دا ده چې د خوب پر مهال باید له لوړ بالښت څخه ګټه واخلي.
د اومېندوارې مېرمنې د ډوډۍ او خوب تر منځ باید دوه ساعته واټن وي، تر څو ډوډۍ یې ښه هضم شي او د معدې له سوځېدو خلاصه شي.
په پای کې بیا هم ویلای شو چې د ترخو خوړو خوړل د ماشوم لپاره هېڅ ستونزه نه لري، خو کولای شي اومېندواره مېرمن له پورتنیو ستونزو سره مخ کړي.
