ژباړه ـ ریاض مقامزی
زموږ او ستاسې ژوند له بې شمېره پېښو ډک دی؛ ګڼ شمېر عوامل ددې سبب کېدای شي، چې د بدن کومه برخه مو زخمي او وینه بهېدنه پیل شي. که د وینې جریان ژر و نه درول شي، ډېر امکان شته چې زخمي کس خپل ژوند له لاسه ورکړی. همدې مسئلې ته په کتو ټول باید پر دې لارو چارو پوه شو، چې د وینې جریان پرې درولای شو. که له داسې حالاتو سره مخ کېږئ دا لارښوونې عملي کوئ.
• زخم بند کړئ!
کله چې کومه ساحه زخمې کېږي؛ نو هڅه وکړئ را پورته شوې غوښه/پوټکی بېرته خپل ځای ته ورولئ او فشار پرې راوړئ. بیا یې په یوې ټوټې سره وتړئ، پدې ډول له زخم څخه د وینې بهېدنه درېږي.
• د زخم ځای پورته ونيسئ!
که د زخم ځای ته د وینې ورتګ ورو کړای شي، د وینې جریان درېږي. له همدې کبله توصيه کېږي چې د زخم ځای پورته ونيسئ. دا ځکه چې په بره طرف د وینې جريان چټک نه وي؛ نو د وینې بهېدنې د درېدو او یا ورو کېدو سبب کېږي.
• له یخ څخه ګټه واخلئ!
که د زخم پر ځای یخ کېښودل شي، ډېر امکان شته چې د وینې جریان ودرېږي. ددې علت دا دی، چې یخ ستاسو د وینې رګونه منقبض کوي او له همدې امله د وینې بهېدنه درېږي.
• چای!
که د زخم په ځای کې چای کېږدئ ډېر امکان شته، چې د وینې جریان ودرېږي. البته هغه چای چې په یکبار مصرف وړو پوڼيو کې وي. دا ځکه چې په چای کې "تانن" وي، کوم چې د وینې د درېدو سبب کېږي.
• اوړه
که زخم په پوستکي کې وي دا چاره تر ټولو ژر اغېز کوونکې ده. لږ اوړه د زخم له پاسه واچوئ او د ۲۰ دقیقو لپاره یې پرېږدئ. ډېر ژر به د وینې جریان ودرېږي.
وروستۍ خبرې
پورتني تګلارې هغه وخت عملي کړئ، چې پوهېږئ ډاکټر ته رسېدل ډېر وخت نیسي. که روغتون نږدې وي، فقط زخم په یوې پاکې ټوتې وتړئ او ژر تر ژره روغتون ته مراجعه وکړئ.
