لیکنه ـ ریاض مقامزی
نن (د اپرېل درې ویشتمه نېټه) د کتاب نړېواله ورځ ده. په ټولنيزو رسنیو کې ګڼو خلکو د مطالعې او کتاب لوستنې په اړه خپل نظرونه لیکلي وو. د ډېريو تأکيد دا و، چې خلک باید مطالعې ته مخې کړي؛ خو پوښتنه پيدا کېږي انسان باید ولې مطالعه وکړي!؟
ځینې ډېر مهم دلایل شته، چې مطالعه ته یې خورا زیات اهمیت په برخه کوي. د بېلګې په توګه:
• مطالعه د فکر تغذيه ده.
لکه څنګه چې د انسان بدن د خپل دوام او روغتيا لپاره خوړو ته اړتیا لري؛ په همدې شکل زموږ او ستاسو دماغ مطالعې ته اړتیا لري، ترڅو تغذيه شي او له کاره و نه لويېږي.
• د مثبت بدلون لاره ده
انسان تل هڅه کوي، چې پخپل ژوند کې مثبت بدلون وویني او سبا یې تر نن ښه وي؛ نو که تاسو هم دا هیله لرئ، مطالعه خپل عادت وګرځوئ. مطالعه کولای شي ستاسو په ژوند کې مثبت تغییر راوړي.
• خبرې مو تاثير پیدا کوي.
د هغو خلکو خبرې چې مطالعه کوي، نسبت هغوی ته چې نه یې کوي څو چنده ښه وي. دقیقه او منظمه مطالعه تاسو ته د قوي منطق، استدلال او فصیحې وینا هنر در بخښي. که مطالعه ولرئ، کولای شئ نور خلک قانع کړئ او د یوه اغېزناک ويناوال په توګه به څرګند شئ.
• حوصله مو ډېرېږي!
کتاب لوستنه د نورو ګټو ترڅنګ تاسو ته د زغم هنر درکوي. ددې اصلي علت دا دی، چې مطالعه تاسو ته د هرې موضوع په اړه معلومات انتقالوي. له همدې کبله تاسو هرې کړنې ته د احساساتو پر ځای، د خپلو معلوماتو او پوهې پر اساس ځواب مومئ. نو د نالوستو او یا کم مطالعه لرونکو برعکس تاسو غیر عاقلانه غبرګون نه ښيئ؛ بلکې منطقي حللاره مومئ.
• له نورو سره توپیر لرئ!
مارک ټواین وایي، "څوک چې مطالعه نه کوي، له بې سواده کس څخه هېڅ غوره والی نه لري.“ پخوا به د لیک لوست زده کړه د سواد لپاره معیار ګڼل کېده؛ خو اوس د نورو ځانګړنو ترڅنګ باید یو لوستی کس ډېره مطالعه هم ولري. که تاسو لیک لوست کولای شئ؛ خو مطالعه نه کوئ. نو ځان ته باسواده مه وایئ.
وروستۍ خبرې
که یو څوک مطالعه نه کوي، له کومو ستونزو به مخ کېږي؟
ـ ژر د نورو تر تاثیر لاندې راځي.
ـ تکراري خبرې کوي.
ـ د لغتونو پانګه یې کمزورې وي.
ـ په موضوع کې منتطقي استدلال نه شي کولی.
ـ پر هغه څه چې وايي خپله هم سم نه پوهېږي.
ـ ماغزه یې له ګټې اخیستنې پرته پاتې کېږي.
ـ سنجیده نه شي غږېدلی.
ـ خپلې ګټې نه شي پېژندلای.
ـ ژر غوسه کېږي.
ـ د نورو پر حقونو تېری کوي.
