لیکنه ـ ریاض مقامزی
حکایت دی؛ د باغ څښتن يو حکیم ته وويل، چې کمکي زوی ته یې نصحيت وکړي، چې د نيالګو له ماتولو او ضرر رسولو لاس واخلي. حکیم یې زوی یوه تازه ایښودل شوي نيالګي ته ودراوه، ورته ویې ويل: را ایستلای یې شې؟ هلک سمدستي بريد ورباندې وکړ او د سترګو په رپ کې یې نیالګی راوایست. حکیم یو څه لوی نیالګي وروښود. هلک هغه هم را وایست. حکیم وار په وار غټ نيالګي ورښودل او لږ وروسته هلک چې د ستړيا خولې ورباندې ماتې وې، وويل: نه يې شم را ایستلای. حکیم ورته وويل : بد عادتونه په اوله کې په اسانۍ سره ختمېږي؛ خو د وخت په تېرېدو سره يې ختمول مشکلېږي. اوس که وغواړې بد عادت سمدستي پرېږدې؛ خو يو وخت به که څه هم د خجالت په خولو کې ډوب يې به خو له بد عادته به ځان نه شې ژغورلای.
درسونه
• که بد عادتونه لرئ، باید همدا اوس یې پرېږدئ؛ کنه ډېر امکان شته چې د پرېښودلو وړتیا له لاسه ورکړئ.
• د یوې اضافه توصیې په توګه ویلای شو یوویشت ورځې زحمت ستاسو بد عادت له منځه وړي. د هر بد عادت پرېښودل یوازې ۲۱ ورځې وخت نیسئ. که غواړئ؛ نو ۲۱ ورځې هغه عادت چې لرئ ځان ترې وساتئ نور بیا کولای شئ پرېږدئ.
• کله چې کوم بد عادت لرئ نو هڅه وکړئ په لومړي سر کې یې مهار کړئ، پدې توګه ډېر ژر کولای شئ لاس ترې واخلئ.
• کله چې پر له پسې بد عادت کوئ نو ډېر ژر ستاسو دايمي ستونزه جوړېږي او بیا ترې منع کېدل سختېږي.
