ليکنه - رياض مقامزی
له خفګان څخه د خلاصون لپاره ارواپوهان دغه کړنې توصیه کوي؛ نو که تاسو هم له دې ستونزې څخه کړېږئ، دا کارونه مو ستونزه ختمولای شي.
• ځان بوخت وساتئ!
که له خفګان څخه کړېږئ؛ نو د مهارولو تر ټولو غوره طريقه يې همدا ده، چې مصروف شئ؛ خو باید مثبته بوختيا پيدا کړئ. مثلاً ورزش کول، کتاب لوستل، مفيدې تلويزيوني/رادیویي خپرونې ليدل/اورېدل او ورته نور کارونه ګټورې بوختياوې بللی شو.
• له انټرنيټ او مجازي نړۍ څخه لرې اوسئ!
څېړنو ښودلې ده چې په اوسنۍ زمانه کې د خفګان له اساسي عواملو څخه یو هم هم مجازي نړۍ ده. که تاسو هم له هغو کسانو څخه يئ چې خپل ډېر وخت په انټرنيټ کې تېروئ؛ نو همدا نن باید دا عادت پرېږدئ او ذهني آرامي ترلاسه کړئ.
• عبادت وکړئ!
له خفګان څخه د خلاصون له ګټورو لارو څخه مراقبه او عبادت کول هم دي. پدې کړنې سره مو پریشاني کنټرول او حتی له منځه ځي.
• له نورو سره ځان مه پرتله کوئ!
د نورو ژوند ته پسخېدل او له هغوی سره د خپل حالت مقایسه کول پدې معنی ده چې تاسو قصدا خپل ځان د خفګان کندې ته ځان اچوئ. له دې کار څخه جدي ډډه وکړئ.
• له ټګۍ او ګناهونو څخه ځان وساتئ!
هغه کسان چې ټګ وي او ډېر ګناهونه کوي د وجدان له عذاب څخه کړېږي او پر ژور خفګان اخته کېږي. ددې لپاره چې له خفګان څخه لرې اوسئ باید نیت صفا کړئ او له ګناهونو ځان وساتئ.
