د کرونا ويروس له خپرېدو سره د "ووهان" ښار نوم نږدې ټولې نړۍ وپېژنده. ځکه چې ووهان ددې ويروس د خپرېدو مرکز و. په دې لیکنه کې به تاسو د ووهان ښار په اړه لا ډېر پوه شئ. ووهان له شانګهای، مسکو، پیکن، او لندن وروسته د نړۍ پنځم لوی ښار دی. د ترانسپورت د ډېرې ګڼې ګوڼې له کبله ځينې خلک دې ښار ته د چین شيکاګو وايي. ووهان "Wuhan" د چین له لویو ښارونو څخه ګڼل کېږي.
د نفوسو په لحاظ ددې هېواد شپږم ستر ښار دی. دغه ښار د پرمختللي ولايت (هوبئي) مرکز دی. که څه هم دغه ښار اوس ډېر پرمختللی دی خو تاریخي قدامت یې "۳۵۰۰" کلونو ته رسېږي. په تاریخي لحاظ دغه ښار د درېيو نورو ښارونو (پووچانګ، هانکو او هانیانګ) له ادغام څخه منځته راغلی دی. د ښه موقعيت له کبله یاد ښار د نورو ښارونو ترمنځ د وصل د نقطې حيثيت لري. له دې ښاره د چين نورو سیمو ته د ورتګ امکان اسانه دی.
ددې ښار ګڼ تاريخي او فرهنګي ځایونه ددې سبب شوی، چې ګرځندویان ورمات شي. د چين دولت ياد ښار د خپل هېواد د سیاسي، اقتصادي او فرهنګي مرکز په توګه پېژني. د اوسېدونکو شمېر یې شاوخوا "۱۱" میلیونه دی. ددې ښار هوا نیمه ګرمسیر ده. ورښت په کې ډېر زیات وي. په اوړي کې یې د تودوخې درجه تر "۲۶" سانتي ګرېډ او ځينې وخت له دې هم پورته کېږي.
په پسرلي او مني کې یې هوا معتدله وي، خو ژمی یې سوړ وي، چې د واورې ورښت هم لري. همدارنګه که تاسو ددې ښار ليدل غواړئ نو Yellow Crane Tower, Wuchang, Bianzhong, Zhongshan، ختيځ سیند او جيکينګ هغه سيمې دي چې د ګرځندویانو پام يې ځانته اړولی دی او هر کال ګڼ شمېر سیلانیان د یادو ځایونو لیدو ته ورځي.
