د انسان فکر؛ تر ټولو غوره ټېکنالوژي

د انسان فکر؛ تر ټولو غوره ټېکنالوژي

ډېر کسان د ځان د مدیریت او ودې لپاره د خپل فکر ټېکنالوژي کاروي. ستاسې پۀ ذهن کې ډېر څۀ موجود وي، خو پر هغې کار نۀ وي شوی او دا د فکر څرنګتیا ده، چې ستاسې لاشعور را ویښوي او د پنځؤنې لامل کېږي.
هغه کسان چې د خپل فکر پر ټېکنالوژي باورمن وي، پر مخ یې د پرمختګ ټولې لارې پرانېستې دي. ټېکنالوژي او هر بل انساني پنځؤنه د انساني فکر زېږند دی. پس دا ویلی شو، چې زموږ فکر خپله یوه عالي ټېکنالوژي ده. دا اوس پۀ موږ پورې اړه لري چې لۀ دې ټکنالوژۍ څخه څۀ ډؤل ګټه اخلو.
د بريا او ناکامۍ پۀ تړاو، ستاسې دواړه فکرونه منفي/مثبت پرځای دي، خو مثبت فکر ستاسې ژوند جوړوي. برعکس، پۀ منفي افکارو سره ستاسې ژوند پۀ دوزخ بدلېږي. هغوی چې مثبت فکر کوي، وده او پرمختګ کوي؛ ځکه فکر یې د ودې او پرمختګ پر لور سوق کېږي. کۀ تاسې خپل ژؤند د مثبتې روحیې پۀ سیسټم مدیریت کړﺉ، پۀ ژوند کې به مو ژور بدلون راشي. د انسان فکر ډېری لۀ باورونو سرچینه اخلي، اوس کۀ ستاسې باورونه مثبت او غوره وي نو ژؤند او شخصیت مو ورسره وده کوي، خو کۀ باورونه مو منفي او پرېوتي وي، فکر مو هم تر اغېز لاندې راولي او دا پۀ لوی لاس پر ځان د ودې او پرمختګ د لارې بندؤل دي. کۀ لۀ تاسې سره دا فکر وي، چې انجنیر کېږﺉ، پۀ همدې مثبت فکر ارو–مرو انجنیر کېږﺉ. کۀ یو څو ځله پۀ ریاضیکي مضامینو کې پاتې شوﺉ، ځان منفي افکارو ته مۀ سپارﺉ، ځکه منفي افکار مو د انجنیر کېدو مخه نیسي، خو کۀ دا فکر کوﺉ چې «ځه دا خو پکې راځي راتلونکی ځل به کوښښ ؤکړم چې پۀ هېڅ مضمون کې پاتې نشم...»، دغه مثبت فکر تاسې تر خپل منزل پورې رسؤلی شي. نن–سبا عامه ټېکنالوژي پر دې کار کوي، چې څنګه فکر کنټرول کړي، خو دا هم د فکر محصول دی. د فکر ټېکنالوژي تر هغۀ څۀ لوړه ده، چې نن سبا یې موږ د عامې ټېکنالوژۍ پۀ توګه پېژنو. تاسې کۀ هر څومره د ورځې دود ټکنالوژیکو توکو؛ موبایل، کمپیوټر او روباټیکو څیزونو ته لاسرسی ولرﺉ، دا ستاسې لۀ پرمختګ سره یوازې د یوې وسیلې پۀ توګه مرسته کوي او بس. خو هو، کۀ د خپل فکر ټېکنالوژي چې موبایل او روباټ یې هم محصول دي وکاروﺉ؛ ستاسې فکر، وړتیاوې، حافظه، د پېژندنې او درک قوت ټول ورسره لوړېږي. ډېر کسان لۀ دې امله خپله فکري ټېکنالوژي لۀ لاسه ورکوي، چې د نورو د فکر پر محصول (ټېکنالوژۍ) متکي وي. تاسې شپه او ورځ پۀ کمپیوټر کې کار ؤکړﺉ، دا د بل چا د فکر محصول دی او تاسې یوازې تقلیدي عمل کوﺉ، یا د یوې وسیلې پۀ توګه کار ترې اخلئ، خو کۀ تاسې خپل فکر وکاروﺉ او پۀ دې ټېکنالوژي کې د یوۀ نوي څیز پر پنځولو غؤر وکړﺉ، دا به ستاسې د فکر غوړېدا وي. ستاسې پۀ ذهن او فکر کې همدا اوس آنلاین ټېکنالوژي موجوده ده. تاسې همدا شېبه لکه د انټرنېټ نړۍ، چې زرګونه خلک سره نښلوي، پۀ خپل ذهن او فکر کې پۀ زرګونو مفاهیمو سره رد او بدل کوﺉ. نو د خپل فکر او خپل شته استعداد پۀ غوړېدا او ښکاره کؤلو کې مخکښ اوسئ. ستاسې تفکر باید تل پۀ حرکت کې وي، پر یوۀ نوي څیز غور وکړئ، څو دا نوی څیز یوه نوې آیډیا او نوې ټېکنالوژي وزېږوي. ټېکنالوژي تاسې تر یوۀ محدود وخت پورې شتمن او موړ ساتي، چې کال پرې تېر شي ورو–ورو خپل ارزښت لۀ لاسه ورکوي، خو شتمن او مبتکر ذهن ستاسې ارزښت دوامدار ساتي او د ټېکنالوژۍ تولیدګر اړ دي، چې ستاسې پیروان پاتې شي.
نو پۀ همدې اساس ویلی شو چې: "د انسان فکر تر ټولو لوړه او غوره ټېکنالوژي ده".

نوښتګر اوسئ!