پر ځان باور څنګه زیاتولی شو؟
اکثره خلک د self-confidence (اعتماد به نفس) پر مفهوم سم نه پوهېږي. له همدې کبله دې موضوع ته په ارزښت نه دي قایل، په داسې حال کې چې ارواپوهنه هره ورځ په دې اړه نوې څېړنې کوي.
وروستۍ څېړنيي وايي، چې له ماشومتوبه باید انسانانو ته د پر ځان باور روحيه ورکړل شي، تر څو دوی نوښتګر اوسي. په اصل کې self-confidence زموږ او ستاسې د بریا تضمين کوي نو اړينه ده، چې په دې اړه ډېر وپوهېږو.
پر ځان باور (اعتماد به نفس) په دې معنی چې نه وېرېږم! زه کولای شم! زه ګټونکی یم! بریا زما ده او همداسې ګڼ نور. په دې ځای کې به تاسو پوه شئ، چې څنګه د پر ځان باور کچه لوړه کړو.
لومړی: تېر هېر کړئ او راتلونکی مو جوړ کړئ! تاسو باید پوه شئ چې خپله ماضي نه شئ بدلولای مګر راتلونکی تقریبا ستاسو لاس کې دی. ښه راتلونکی حتمي دی خو که تاسو نن خپله هڅه پيل کړئ او موخې مو تعقیب کړئ. زموږ موخه دا ده، چې د ماضي په بند کې مه پاتې کېږئ. خو له خپلو ماتو او خطاوو څخه اخیستی درس مو هېڅکله مه هېروئ. ماضي ته د یوه استاد په شکل وګورئ خو افسوس مه کوئ. ماضي خوب وګڼئ خو تعبیر یې سم وکړئ.
دویم: د خپلو موخو په اړه له خپل ځان سره وغږېږئ! خپلې موخې په یوه لیست کې وليکئ. وروسته له بشپړېدو بیا پرې نظر وکړئ، ځينې بې ارزښته موخې لرې کړئ او ځينې نور، چې ډېر ارزښت لري ور زیات کړئ. له دې وروسته تاسو د لومړيتوب پر اساس خپلې موخې ترتيب کړئ. له دې وروسته د هرې موخې لپاره پر خپل پلان غور وکړئ. په اصل کې همدا کار د خپلو موخو په اړه له خپل ځان سره غږېدل دي. خو د پلان له بشپړېدو وروسته اقدام بلې ورځې ته مه پرېږدئ همدا نن پاڅئ او پیل وکړئ.
همدارنګه کوښښ وکړئ داسې موخې وټاکئ چې ژر یې ترلاسه کولای شئ. دا کار ددې سبب کېږي، چې تاسو په کوچنيو موخو کې بریالي شئ او دغه بریا په لویو موخو کې د کامیابۍ انګېزه هم درکوي.
درېيم: تصمیم نيول تمرین کړئ ارواپوهانې ثابته کړې ده، هغه ماشومان چې په کوچنيتوب کې یې د خپلو کارونو په اړه خپله تصمیم نيوه نسبت هغو ته چې دا کار یې نه دی کړی، ډېر پر ځان باور لري. دا په دې معنی نه ده، چې مشوره مه کوئ. خو کوښښ وکړئ وروسته له مشورو خپله تصمیم ونیسئ چې څه کوئ؟ څنګه کوئ او کله کوئ؟ تاسو کوچني کارونه پلان کړئ. بیا تصمیم ونيسئ، چې څنګه یې ترسره کوئ. دا کار هره ورځ تمرین کړئ نو ډېرې مثبتې پايلې به ولري. په کم وخت کې به مو د پر ځان باور کچه ډېره لوړه شې.
څلورم: د خپلو بریاوو په اړه فکر وکړئ! که تاسو د خپلو لاسته راوړنو په اړه فکر کوئ په اصل کې تاسو انرژي اخلئ. دا کار ددې سبب کېږي چې تاسو فکر کوئ ګټونکي یئ. تل مو بریاوې درلودې. ماتې ستاسې په برخه نه دي. کله چې ستاسو ذهن کې همدا حالت راځي دا په دې معنا چې تاسو پر ځان باور لرئ. کوښښ وکړئ هره ورځ دا کار تمرین کړئ تر څو پر ځان باور مو ډېر شي.