هغه جملې چې ژوند مو بدلولای شي!
ليکنه ـ رياض مقامزی
په دې ليکنه کې به د انګلستان د نوموتي ليکوال او د رنسان دورې د وروستۍ دورې استازي جان ميلټن (John Milton) په ويناوو کې د ژوند درسونه ولولئ.
“ذهن پر خپل تخت ناست دی او کولای شي د خپل ځان دننه له جنت نه دوزخ او له دوزخ نه جنت جوړ کړي.”
خوښي او خفګان کوم ځای او څيز نه دی، چې ورشو او يا يې وپيرو. بلکې يو ذهني حالت دی، چې جوړول غواړي. د ميلټن موخه هم همدا ده، په دې معنا ستاسو ذهن دی چې حالت مو بدلولای شي.
که تاسو له يوې ستونزې سره مخ شئ، نو هڅه وکړئ مثبتو اړخونو ته فکر وکړئ. اکثره ستونزې په فرصتونو هم بدلېږي. خو که پر تاسو يې منفي لوري اغېز وکړي نو ممکن کوچنۍ ستونزه لويه شي او لا ډېر وځورېږئ. نو په سختو حالاتو کې تل خپل فکر او ذهن په واک کې ولرئ. که داسې و نه کړئ، حتمي ده چې نامناسبې پرېکړې به کوئ او له ستونزو سره به مخ کېږئ.
“ويښ شه، پاڅېږه، که داسې و نه کړې ښايي تر ابده ولوېږي.”
په اوسني وخت کې دا خبره ډېره اړينه ده. اکثره خلک د لنډې مودې خوښۍ په پار خپل ابدي حالت خرابوي. کوښښ وکړئ تل اوږدمهاله فکر ولرئ. دا خبره په کورني، کاري او علمي ژوند کې د تطبيق وړ ده. هېڅکله احساساتي پرېکړې مه کوئ. بلکې په ويښه، په سوچ او تدبير سره ولاړ شئ.
همدارنګه تل بايد د حالاتو تقاضا په پام کې ونيسئ. نننۍ زمانه له شل کاله وړاندې وخت سره ډېر توپير لري. که تاسو له عصر او حالاتو سره سم خپل فکر چمتو نه کړئ نو د تل لپاره وروسته پاتې کېدای شئ.
