د پروستات غُدې اړوند ناروغي!
4,153
Riaz Muqamzai - ریاض مقامزی
2021-04-08 01:56:52
پروستات ته په انګلېسي ژبه کې "Prostate" وايي. چې د "پروسټيټ" په شکل تلفظ کېږي. د نارینه وو په جنسي سیستم کې د مثل د تولید یوه اساسي غده بلل کېږي. ددې غدې حجم په سالمو وګړو کې چې عمر یې له ۵۰ کالو ښکته وي. د یوه چهارمغز په اندازه وي. چې وزن یې له "۰.۷۵" اونسو سره برابرېږي.
پروستات په ګېډه کې د کولمو په ښي اړخ او د تناسلي الې او مثانې په منځ کې موقعیت لري. د نارینه سپرم او تشې بولې له تناسلي الې تر وتلو وړاندې باید له همدې غُدې تېر شي.
دا غُده له نارینه وو سره د نسل په تولید کې مرسته کوي. ځکه چې یو ډول مایع ترشح کوي، چې د "مني" برخه جوړوي.
د پروستات د ناروغۍ ډولونه
څو ناروغۍ موجودې دي، چې پر پروستات غُدې تاثیر کوي. ځینې یې بکتریایي او سرطاني دي. په دې غده کې د هرډول نارغيو خپلې نښې نښانې موجودې دي. یو ډېر عام ډول یې ددې غُدې غټېدل دي. چې ځينې نښې نښانې لري.
دپروستات غُدې د غټېدلو نښې!
ـ دا ناروغان ژر ـ ژر د تشو بولو کولو اړتیا احساسوي. کله کله د تشو لږ لږه سوځیدنه هم ورسره وي.
ـ له تشو بولو وروسته هم د مثانې د ډکوالي احساس.
ـ د تشو بولو بندېدل.
ـ په فشار سره د بولو وتل.
ـ د اودس ژر نه وچېدل.
یادونه: ددې ناروغۍ د درملنې په برخه کې باید ووایو، چې له دوو لارو دا ستونزه حل کېدای شي. په درملو او عملیات سره، چې روغتياپالان د ستونزې حالت ته په کتو پرېکړه کوي.
