د ژوند د درسونو په لړۍ کې به دا ځلې د انګلستان د نوموتي ډرامه ليکونکي او شاعر جورج ګورډن بايرون (George Gordon Byron) په ويناوو کې د ژوند درسونه ولولئ.
“وياړ د وينو په تويلو کې نه دی، د اوښکو په وچولو کې دی.”
دلته له وينو تويلو څخه رښتيا هم د نورو خلکو د وژولو معنا نه ترلاسه کېږي. بلکې د بل د ځورولو، ربړولو او خفه کولو مفهوم هم په کې نغښتی دی. د ليکوال موخه دا ده، چې بايد نور خلک و نه ځورو او هېڅکله يې و نه رټو. ددې پر ځای يې بايد اوښکې وچي کړو. مينه ورکړو او پر شونډو يې مسکا راولو. د ژوند خاص خوند او سکون هم په همدې کې دی، چې د نورو لاسنيوی وکړو او اوښکې يې وچې کړو.
“ستا ټول وخت خپل نه دی، نور هم په کې برخه لري؛ هماغه ډول لکه ته چې د نورو په وخت کې برخه لرې.”
ځينې خلک تل ګوښه ګير وي، له نورو لرې او يواځې اوسي. دا کار نامناسب دی. انسان ټولنيز موجود دی، نو بايد له نور وګړو سره په اړيکه کې پاتې شي. لکه څنګه چې خلک تاسو ته وخت او مينه درکوي، همداسې نور خلک هم ستاسو مينې او وخت ته اړتيا لري. ټولنيز ژوند په دوه طرفه اړيکو ټينګ دی. پښتانه وايي: بازار ته څه وېسه او څه راوړه.
ژوند په دې نه کېږي چې تل دې نور ستا خيال وساتي او خپل ارزښتمن وخت له تا ځار کړي. په بدل کې تاسو هم بايد نورو ته خپل وخت ورکړئ، حال يې واخلئ، د زړه خواله وکړئ او يو بل درک کړئ.
همدارنګه ځينې خلک له خپلوانو، ملګرو او نورو هغو خلکو چې اړيکې ورسره لري، لرې ګرځي. تل يواځېتوب خوښوي او په دې توګه ځان ورته بې ارزښته ښکاري. دوی ته پکار ده، چې خپله خپل ځان ته ارزښت ورکړي.
انګرېزان وايي، که غواړې محترم شې نو اول د نورو احترام وکړه. موخه دا ده، چې که غواړې نور مو وپالي تاسو يې هم وپالئ.
انساني ژوند ته په کتو بله ډېره مهه خبره دا ده، چې ستاسو عمر يوازې ستاسو نه دی. په دې کې د ملګرو، کورنۍ، مېرمنې، خپلوانو او ګڼو نورو خلکو برخه موجوده ده. بايد د هغوی برخه وسپارئ!
“ټولې نېکمرغۍ او برياوې، چې زما د ژوند ته راغلې، له هغو دروازو راننوتې چې ما کلک بند کړي وو.”
ځينې خلک به ددې جملې په سم مفهوم پوه نه شي، خو ډېر لوړ فکر په کې پروت دی. موږ ځينې څيزونه عادي ګڼو، حال دا چې همدا زموږ د ژوند اساسي برخه جوړوي. مثلا موږ تا دا ارزښت نه لري، چې نن مې څه وکړل. خو همدا ننني کارونه د سبا ورځې بريا تضمينوي. نو هڅه وکړئ، په ژوند کې د کوچنيو کارونو په ارزښت پوه شئ. زه تل دا خبره کوم، دې ته مه ګورئ چې ستاسو سرعت څومره دی. خو دا بايد تل وګورئ، چې روان يئ او که نا! درېدل مه کوئ، روان اوسئ که ډېر ورو هم وي.
ددې جملې بل اړخ دا دی، چې هېڅ فرصت له لاسه مه ورکوئ، په ژوند کې هېڅ فرصت عادي مه ګڼئ. ممکن همدا وړوکی ګام ستاسو ټول ژوند بدل کړي. د فرصتونو په اړه ويل کېږي، چې د بنګړو په څېر دي. که مو پام ورته وکړ شته، او که لغته مو ورکړه بيا هېڅ نشته!
