ژباړه ـ ریاض مقامزی
په ټوله نړۍ کې د ګنيو اوبه ګڼ مينوال لري. په ځانګړې توګه هغه هېوادونه چې ګرمه آب و هوا لري، د ګنيو ډېر مصرفوونکي هېوادونه دي. زموږ په هېواد کې هم د ګنيو له اوبو جوس جوړېږي. خو ډېر کم خلک پر دې پوهېږي، چې کومې روغتيايي ګټې لري. په دې لیکنه کې پر همدې موضوع خبرې شوي دي.
د سل ګرامه ګنيو غذايي ارزښت
ـ ۲۵۶ کالوري انرژي
ـ ۵۸ ملي ګرامه سوديم
ـ ۶۳ ملي ګرامه پوتاشیم
ـ ۷۳ ګرامه کاربوهادریت
ـ ۷۳ ګرامه خواږه
ـ ۱% کلسیم
ـ ۱۹% اوسپنه
ـ ۲ سلنه مګنیزیم
د ګنيو روغتيايي ګټې
ګني ډېرې روغتيايي ګټې لري. پر ځينو به یې دلته په لنډ ډول خبرې وشي.
لومړی ـ د زړښت ضد خاصیت لري
ددې خاصیت اصلی لامل دا دی، چې ګني د فلاونويدونو او فنلي ترکیباتو غني منبع ده. دا ټول هغه مواد دي، چې د انسان پوټکی تازه او له ټولېدو ساتي. ګني د پوستکي روښانه کوونکی بلل کېږي.
دویم ـ د وزن په کمښت کې مرسته کوي
ګني د محلولو فیبرونو يوه ښه سرچينه ده. همدارنګه له طبیعي قندونو څخه ډک دي، چې دوزن په کمولو کې مرسته کوي. دا قلیايي ماده، چې د بدن د غوړ په ختمولو کې مرسته کوي، اسيدي پوست لري. پر دې سربېره بدن ته له اړتیا ډېره انرژي ورکړل شي، د همدې اضافي انرژۍ په ختمولو کې هم مرسته کوي.
درېيم ـ د بدن دفاعي سیستم پياوړی کوي
اکثره روغتياپالان پر دې باور دي، چې د ګنیو اوبه د بدن دفاعي سیستم ته ځانګړی ځواک وربخښي او د ناروغيو پر وړاندې مقاومت پيدا کوي. که چېرې ستاسو د بدن دفاعي سیستم پیاوړی وي، د سرطان د ځينو ډولونو په شمول، ګڼې خطرناکې ناروغۍ دفع کولای شي. نو که غواړئ، قوي دفاعي سیستم ولرئ پخپل غذايي رژيم کې ګنيو ته هم ځای ورکړئ.
څلورم ـ اسټریس ختموي
د بدني روغتيا ترڅنګ انسان باید روحي روغتيا هم ولري. په اوس وخت کې ډېری خلک له فشار او وېرې سرټکوي. په داسې حال کې چې د پرمختګ او صحت لپاره رواني روغتيت خورا اړين بلل کېږي. نو که غواړئ، خپل فشار کنټرول کړئ د ګنيو اوبه مه هېروئ.
پنځم ـ د زړه روغتيا مو تضمينوي
که په ګنيو کې موجود پوتاشیم ته پام وکړو، دا ددې سبب کېږي چې په زړه کې د وينې فشار کم کړي. همدارنګه په رګونو کې د وینې پنډ کېدلو مخه نیسي. په دې توګه د زړه د سکتې ترڅنګ د زړه ګڼو نورو ناروغيو مخنيوی کېږي.
شپږم ـ د بډوډو تيږه له منځه وړي
د ګنيو اوبو له خاصیتونو څخه یو هم د ادرار سیستم پیاوړي کول دی. په دې توګه ستاسو پښتورګي، مثانه او نور تړلي غړي منظم فعالیت کوي، چې په پایله کې د تيږو د نه پيدا کېدو او یا هم د وتلو زمینه برابروي.
له دې ګڼو ګټور ورهاخوا د غاښونو د روغتيا تضمين هم کوي؛ هاضمي سیستم په ښه والي کې هم بې اغېزې نه دي. دومره ډېرو ګټو ته په کتو باید هېڅکله د ګنیو اوبو ته په کمه سترګه و نه کتل شي. خو دا هم باید هېر نه کړئ، چې له اندازې ډېره کاروونه یې جدي روغتيايي ستونزې هم زېږوي.
