نن سبا په ټولنيزو رسنيو هغه امريکايي پلار باندې نيوکې کېږي، چې وايي د کتاب د لوستو په بدل کې خپل زوي ته ډالر ورکوي. هغه وايي چې د ١٦٠ مخونو کتاب په بدل کې خپل زوي ته ١ ډالر ورکوي.
د سان فرانسيسکو په بى ايريا کې اوسېدونکي ډيويډ ووډلېنډ تېره اونۍ په ټويټر کې ليکلي و، چې هغه د يو کتاب لوستو په بدل کې خپل زوي ته ١ ډالر ورکوي، هغه وايي چې له زوي سره يې د ١٦٠ مخونو د کتاب خبره شوې ده.
نوموړي دا هم ليکلي و، چې په دې کال کې يې خپل زوي ته ١٢٠ ډالر ورکړي دي. هغه وايي چې زما زوي فکر کوي چې ما لوټي، خو زه غوره پانګونه کوم.
@DavidSven
We pay my oldest $1 every time he reads a book. We’re talking 160 page chapter books.
I’m out $120 this year and he thinks he’s ripping me off. Best investment ever.
خو د هغه له دې ټويټ وروسته په ټويټر کې يو شمېر خلکو په هغه سختې نيوکې وکړې. خلکو ورته وليکل چې دا کار غلط دى، ځکه چې له خپل زوي څخه يو لالچي انسان جوړوي.
يو شمېر خلکو دغه کس ته په ځواب کې ليکلي و، چې که په دې کوچني عمر کې يې زوي د پېسو عادت خپل کړ، نو که چېرته سبا پېسې ور نه کړل شي، ښايي هغه د کتاب لوست هم پرېږدي.
همدا راز يو شمېر کسانو بيا ډيويډ ووډ لېنډ ته مشوره ورکړه، چې د کوم ارواپوه سره دې وويني، تر څو د هغه ستونزه ورحل کړي.
خو د خلکو له نيوکو وروسته ډيويډ ووډ لېنډ په يو بل ټويټ کې له خپل ځان نه دفاع هم وکړه. هغه وويل چې خپل زوي ته د کتاب د لوستو په بدل کې د ډالر ورکولو مشوره د هغې د مېرمنې وه، نو هغه ځکه دا کار وکړ. نوموړي وليکل، که په دې اړه کومې نيوکې او ستاينې کېږي، نو د هغه نيوکو او ستاينو حقداره يې هم مېرمن ده.
د يادولو وړ ده چې د ډيويډ ووډ لېنډ دا ټويټ څه کم پنځه سوه زرو کسانو خوښ کړى دى، تر ٤٤ زرو څخه زياتو کسانو ريټويټ کړى دى او همدا راز له ١٢٠٠ څخه زياتو کسانو بيا پرې تبصرې کړې دي.
