پاول ایلوار

د نړۍ په ادبیاتو کې پاول ایلوار یو خاص نوم دی. نوموړی د فرانسې هېواد د شلمې پېړۍ له هغو شاعرانو دی، چې د سوریالېزم د ادبي مکتب له بنسټګرو ګڼل کېږي. په دې لیکنه کې به د همدې شاعر په اړه لا ډېر پوه شئ.

پېژندنه

د فرانسې ددې ستر شاعر اصلي نوم "ایوژن ګرندل" دی، خو د پول ایلوار (Paul Eluar) په نوم مشهور دی. نوموړی په "۱۹۸۵م" کال کې د فرانسې په سن دني ښار کې دې نړۍ ته سترګې پرانیستلې. مور یې خیاطي کوله او پلار یې هم یو عادي کارکوونکی و. 

کله چې ایلوار له ښوونځي فارغ شو، پر نري رنځ اخته شو. ځکه نو نوموړی و نه توانید لوړې زده کړې ترسره کړي. د یو اوږد سفر او استراحت لپاره سویس هېواد ته لاړ هلته یې یو نیم کال تېر کړ. په ښکلو ښارونو، غرو رغو وګرځېد. چې کله بېرته راستون شو نو روغ جوړ و. 

په همدې وخت کې یې شاعري هم پیل کړه. ورپسې یې یو څه موده عسکري هم کوله. د شعرونو لومړنۍ ټولګه یي په "۱۹۱۷م" کې چاپ شوه. د خلکو له تاوده هرکلي وروسته نوموړی لا وهڅېد. نور شعرونه یې هم ولیکل.

کله چې په "۱۸۲۴م" کې له خپلې مېرمنې جلا شو. سخت رواني حالت یې تجربه کړ. بیا یې سفر ته مخه کړه. د چین، هند، مالیزیا او سینګاپور په ګډون ګڼ شمېر آسیايي هېوادونه یې ولیدل. 

د خپل ژوند په جریان کې ګڼ شمېر شعرې ټولګې یې خپرې کړې. بالاخره له ګڼو ادبي فعالیتونو وروسته په "۱۹۵۲م" کې د ۵۷ کلونو په عمر ومړ. 

د شعر بېلګه

خپلې مخې ته مې وکتل 

په ګڼه ګوڼه کې مې ته ولیدې 

د غنمو د وږیو په منځ کې مې ته ولیدې 

د خپلو ټولو سفرونو په پای کې

د خپلو ټولو عذابونو په زور کې 

د خپلو ټولو خنداګانو په شور کې

په اوبو او په اور کې

په اوړي او ژمي کې مې ته ولیدې

په خپل کور کې مې ته ولیدې

په خپلو خوبونو کې مې ته ولیدې

زه به نور ستا له مینې لاس وانخلم!