لیکنه: شکېبا نادري، څنګه خپل عاشق یا معشوقې ته خپله مینه څرګنده کړو؟
مینه د هر بل احساس په څېر هغه احساس دی چې د هر نارینه او ښځینه په وجود کې شته دی او د وخت په تېرېدو سره پیاوړی کېږي. له هغه وخت څخه چې یو ماشوم وزېږېږي، کله چې وږی شي ژاړي، همدا ژړا یې هغه مینه ده چې د ماشوم او مور ترمنځ شتون لري.
مینه یوازې دا نه ده، چې یو هلک به یې له نجلۍ سره لري او یا د یوې نجلۍ مینه له هلک سره، مینه بېلابېل ډولونه لري لکه، له خدای ﷻ سره مینه، له انسانانو سره مینه، له حیواناتو او داسې نور شیانو سره مینه کېدلای شي.
موږ په دې لیکنې کې تاسو ته په دې اړه معلومات درکوو چې څنګه خپل عاشق/ معشوقې ته خپله مینه څرګنده کړئ.
ډېری هلکان یا نجونې مئینېږي، خو د دې جرات نه لري یا نه پوهېږي چې څنګه خپله مینه مقابل لوري ته څرګنده کړي، نو د تل لپاره یې مینه همداسې نیمګړې پاتې کېږي، که تاسو هم له داسې ستونزې سره مخ یاست، نو زموږ لیکنه تر پایه ولولئ!
۱. د منونکو (تاییدی) جملو کارول
کله مو چې غوښتل خپل عاشق/ معشوقې ته خپله پټه مینه څرګنده کړئ لومړی باید د هغوی له هرې خبرې سره همغږي وښیئ، تر څو مقابل کس په دې پوه شي چې خبرې او پرېکړې یې تاسو ته د منلو وړ دي او درته ارزښت لري.
۲. وخت تېرول
کله چې غواړئ یو کس ته خپله مینه څرګنده کړئ، باید خپل ډېر وخت له هغه/ هغې سره تېر کړئ، له وخت تېرولو څخه مو موخه نږدېوالی نه دی، کېدای شي له لرې واټن څخه هم تاسو دا کړنه د ټلیفون له لارې ترسره کړئ، تر څو ستاسو عاشق/ معشوقه په دې پوه شي چې تاسو غواړئ له هر چا څخه ډېر له دې یا ده سره وخت تېر کړئ.
۳. ډالۍ ورکړئ
د نړۍ په ټولو هېوادونو کې ډالۍ ورکول عامه خبره ده، هر څوک کولای شي خپلو ملګرو، خپلوانو، ټولګیوالو او داسې نورو کسانو ته ډالۍ ورکړي، نو تاسو هم کولای شئ چې د خپلې مینې د څرګندلو لپاره تر ټولو اسانه لار وټاکئ یعنې خپل عاشق/ معشوقې ته ډالۍ ورکړئ، اړینه نه ده چې دا ډالۍ د قېمتي وي اړینه داده چې داسې یو شی و اوسي چې ترې ګټه واخلي او له هر ځل ليدو وروسته یې تاسو په یاد شئ.
۴. مرسته کول
هڅه وکړئ چې تل په هغو کارونو کې چې دوی (عاشق/ معشوقې) ته ستونزمن وي ور سره مرسته وکړئ، په غم او خوښئ کې یې د ګډون هڅه وکړئ، تر څو دوی ستاسو په شتون کې د ارامۍ احساس وکړي.
کېدلای شي د دې ټولو کړنو تر څنګ د مینې د څرګندولو نورې لارې هم شته وي، خو موږ په یادې لیکنې کې تاسو ته هغه اړینې کړنې یادې کړې دي، چې په تر سره کولو سره به یې ارومرو ستاسو عاشق/معشوقه ستاسو مینې ته متوجه شي او یو عکس العمل به وښیي.
