ځينې وخت داسې پېښېږي، چې د یو چا له ټولو خبرو او یا یوازې له یوې جملې ډېر اغېزمن کېږو. دا ډول ویناوې، چې موږ ته انرژي او فکر راکوي، زموږ په ژوند کې خورا مهمې دي. تاسو به په دې لیکنه کې د امریکا لویې وچې د ستر لیکوال، شاعر او فیلسوف "رالف والډو امرسن" هغه ویناوې ولولئ، چې هره جمله یې یو درس دی او یو کتاب خبرې لري. خو تاسو باید د هرې جملې له لوستلو وروسته ژور فکر وکړئ او ځان پوه کړئ، چې د امرسن موخه څه ده.
څو جملې څو کتابه!
ـ ناپوه خلک پر چانس باور لري، هوښیار خلک په علت او معلول.
ـ په یوې دقیقې غوسې سره شپېته ثانیې خوښي له لاسه ورکوو.
ـ سلا او مشوره یو داسې هنر دی، چې تاسو یې په مرسته هرڅوک خپلې همکارۍ ته بولئ.
ـ هر څوک چې راسره مخامخ کېږي، په یوه لحاظ رانه غوره وي، هڅه کوم له هماغه غوره والي یې یو څه زده کړم.
ـ څه چې یئ، تر هغه څه چې وایئ، تاسو ډېر ښه معرفي کوي.
ـ بخت، د هدف لرلو یو بل نوم دی.
ـ کلونه موږ ته ډېر شیان راښودلی، چې ورځې له هغو بې خبره دي.
ـ هغه څه چې په باطن کې نشته، په بهر کې یې نه شو لیدای.
ـ فطرت په دې اصولو عمل کوي، چې ټول د هر یوه لپاره او هر یو د ټولو لپاره.
ـ آزادي، هيڅکله زموږ لپاره انتظار نه باسي، موږ یې باید د ترلاسه کولو لپاره له هيڅ ډول هڅو ډډه و نه کړو. د تاریخ په هيڅ لیک کې نشته، چې آزادي دې وړیا ترلاسه شوې وي.
ـ لوی انسانان هغه دي، چې پوهېدلي؛ معنوي ځواک تر مادي غښتلی دی. عقل او فکر دی، چې پر نړۍ واکمني کوي.
همدارنګه امرسن د تاریخ تر عنوان لاندې په یوه نثر کې وايي: "هغه چاته لوی او واړه فرق نه لري، چې هرڅه ده پيدا کړي دي او دی د ټولو خالق دی. هر چېرته هغه شته، هرڅه شته او هيڅ ځای نشته، چې هغه پکې نشته. زه له دومره کوچنیتوب سره چې هيڅ نه یم، هر څه یم. ځکه چې د ځمکې، د ستوریو او لمریز کال اولاد یم. زه له هغې خاورې پیدا یم، چې د قیصر لاس، د افلاطون ماغزه، د مسیح زړه او د شکسپیر نبوغ یې په ذراتو کې ګډ دي."
