د وینې کمښت (کم خونی) وپېژنئ!
په نړۍ کې بېلابېلې ناروغۍ شته، چې انسانان ځوروي. هره ناروغي ځانته خپل علایم او درمل لري. یو له هغو ناروغيو، چې په اوس وخت کې ډېر تر سترګو کېږي، د وینې کمښت (کم خوني) ده. تاسو به په دې لیکنه کې ددې ناروغۍ په اړه ډېر معلومات ترلاسه کړئ!
د وینې کمښت
د وینې کمښت اصلا په وینه کې د اوسپنې د کموالي په معنا ده. په وینه کې د اوسپنې کمښت یوه جدي ستونزه ده. ځکه چې هموګلوبین ته د اکسیجن د انتقال قوت همدا اوسپنه ورکوي. نو که په وینه کې اوسپنه کمه شي، بدن ته د اکسیجن د انتقال پروسه له خنډ سره مخ کېږي.
که څه هم د وینې د کمښت ځينې نور ډولونه هم شته، خو په ډېره کچه یې همدا د اوسپنې د کمښت ډول تر سترګو کېږي.
د کمخونۍ ځينې عمده لاملونه
ـ کمزوری غذايي رژيم
ـ د بډوډو التهابي ناروغۍ
ـ د امیندوارۍ پر مهال اوسپنې ته د اړتیا ډېرېدنه
ـ د میاشتنۍ ناروغۍ پر مهال د وینې ډېره ضایع
د وینې د کمښت عمده علایم
ـ د غیرې معمولې ستړیا احساس
ـ د پوستکي د رنګ تتوالی
ـ نفس تنګی (ساه لنډېدنه)
ـ سردردي او ګنګسیت
ـ د زړه په ضربان کې اختلال
ـ د ويښتو او پوستکي سپېره کېدل
ـ د خولې او ژبې وتل او درد
ـ نا آرامي
ـ د نوکانو ماتېدل
ـ عجیب هوسونه
ـ د اظطراب احساس
ـ د لاسونو او پښو سوړوالی
څه باید وخورو؟
که د وینې د کمښت ستونزه ولرئ، ډاکټر ته مراجعه وکړئ، ترڅو د ناروغۍ ډول او علت ته په کتو تاسو ته لازمې لارښوونې وکړي. مګر بیا هم د خوړو په برخه کې ځينې لارښوونې شته، چې روغتياپالان یې وړانديز کوي. که تاسو هم د وینې د کمښت ستونزه لرئ، هڅه وکړئ لاندې خوړو ته په مناسبه اندازه په خپل غذايي رژيم کې ځای ورکړئ.
ـ غټه غوښه (د غوا او پسه غوښه)
ـ سبزیجات په ځانګړې توګه پالک او کاهو
ـ وچه مېوه، په ځانګړې توګه ممیز او وچ شوي زردالان
ـ لوبیا او ورته نور حبوبات
ـ د کب غوښه
ـ د چرګ غوښه
ـ د فیلمرغ غوښه
ـ کدو
ـ اینځر