ویلیام بلیک وپېژنئ!

لیکنه ـ ریاض مقامزی

د نړۍ نامتو لیکوالو په نوملړ کې "ویلیام بلیک" هم د ښه نوم او مقام خاوند دی. نوموړی یوازې لیکوال نه و؛ ښه انځورګر او حکاک هم و. په دې لیکنه کې د نوموړې پېژندنه، ویناوې او د شعر بېلګه ولولئ!

ویلیام بلیک څوک و؟

د انګلستان هېواد ددې ستر ادیب او انځورګر بشپړ نوم ویلیام بلیک "William blake" دی. نوموړي په "۱۷۵۷زیږديز" کال کې دې نړۍ ته سترګې پرانیستې. دی د نړۍ په یو لوی او مشهور ښار (لندن) کې وزېږېد. د مور او پلار په اړه یې ډېر څه نشته، خو خپله یې له یوې نالوستې نجلۍ سره واده کړی و. په ماشومتوب کې یې د ملټن آثار، لاتيني کتابونه، د شکسپير شعرونه، انجيل او د وخت ورته نور آثار یې لوستي و. رسمي زده کړې یې د انځورګرۍ په برخه کې کړې وې او په همدې برخه کې یې د تدریس چاره پرمخ وړله. 

بلیک په ژوند مئين انسان و؛ د نوموړې مېرمنه چې نالوستې وه، وکولای شول د بلیک په مرسته لوست او حکاکي زده کړي.

مشهور آثار یې، "د تل کتاب"، "بیت المقدس"، "د تجربې غزلونه"، "د سپېڅلتيا غزلونه" یې مشهور آثار دي. له ګڼو ادبي او هنري فعالیتونو وروسته د اویا کلونو په عمر ومړ.

د بلیک ویناوې

• هڅه وکړه، چې د نېکمرغۍ او خوشحالۍ خبرې زیاتې په خوله راوړې، نه د غم او بدمرغۍ.
• د دښمن بخښل، د دوست تر بخښلو اسانه دي
• که غواړې د ګل له ښکلا او بوی څخه خوند واخلې، باید اغزي یې هم وزغمې.

د شعر بېلګه

زه دې وینم، چې رنځور یې سور ګلابه

ژر به ولوېږې، د ژوند له آب او تابه 

یو چینجی دی، چې په سترګو نه ښکارېږي

نه په شپه او نه په ورځ کې معلومېږي

خپروي په نیمه شپه کې وزرونه 

په توپان کې یې په برخه دي مزلونه

ستا بستر دی، دې ظالم چینجي لیدلی

تر غونچې پورې څو ځله درغلی

ستا پر سر نازکو پاڼو باندې پرېوځي

ستا د زړه ستا د سینې په اوبو کښېوزي

له ښکلا سره دې کړي نامرده مینه

وچوي دې د سینې رنګينه وینه