ليکنه: شکېبا نادري، څنګه د خولې بد بوی له منځه یوسو؟
انسان یو ټولنیز موجود دی او نه شي کولای د ټولنې له وګړو او ټولنیزو اړيکو څخه پرته ژوند وکړي، دوی اړ دي چې له یو بل سره خبرې او تګ راتګ وکړي، دودونو وپالي، د یو بل په غم او ښادۍ کې شریک شي، له همدې امله دوی د یو بل مرستې ته اړتیا لري، ځکه ټول انسانان د یو بل له مرستې پرته ژوند نه شي کولای، خو ځینې انسانان داسې ستونزې لري چې له هغوی سره د اړيکې ساتل ستونزمنې کېږي، لکه د خولې بوی دا هغه ستونزه ده چې ډېری خلک یې لري دا ستونزه ګڼ شمېر لاملونه لري، هغه کسان چې دا ستونزه لري له ډېرو ستونزو سره مخ کېږي دوی نه شي کولای له یو کس سره راحت او مخامخ خبرې وکړي، نه شي کولای دا ستونزه له بل کس سره شریکه کړي او د شرم احساس کوي.
موږ په دې لیکنه کې د دې جدي او ناوړې ستونزې د له منځه وړلو لپاره څو غوره او اسانه لارې درښیو هیله ده چې لیکنه تر پایه ولولئ!
۱. د لیمو اوبه
د لیمو د اوبو د نورو ګڼ شمېر ګټو تر څنګ یوه ګټه دا ده چې د خولې د بدبوی په له منځه وړلو کې اړینه ونډه لري. په یو ګیلاس اوبو کې د لیمو یوه کاشوغه اوبه واچوئ او د څو شېبو لپاره یې په خوله کې ونیسئ ډېر ژر به مو د خولې خوند سم او بدبوی به یې له منځه لاړ شي.
۲. د مالګې اوبه
د مالګې اوبه د مېکروب ضد دي تر سره کوي، هغه کسان چې خوله یې بدبوی لري باید هر سهار لږ مالګه په اوبو کې واچوي او خپله خوله پرې ووینځي.
۳. شین چای
شین چای هم د خولې د بدبوی په له منځه وړلو کې ګټور دی، کله مو چې حس وکړ چې خوله مو بد بوی کوي، نو یوه پیاله شین چای وڅښئ ډېر ژر به مو د خولې بد بوی ورک شي.
۴. د مڼو خوړل
مېوې د بېلابېلو ویټامینونو درلودونکې دي، خوړل یې د انسان لپاره ډېرې ګټې لري، له هغو ګټه څخه یې یوه هم دا ده چې د خولې بدبوی له منځه وړلای شي.
۵. د اوبو څښل
هغه کسان چې خوله یې بد بوی کوي باید تل ډېرې اوبه وڅښي، ځکه د خولې د بوی یو لامل د خولې وچېدل دي، د دې لپاره چې خوله یې وچه نه شي باید ډېرې اوبه وڅښي تر څو د خپلې خولې د بد بوی مخه ونیسي.
۶. د مستو خوړل
د مستو تر ټولو اړینه ځانګړنه دا ده چې په اسانۍ سره کولای شي ناسمې باکټریاوې له منځه یوسي او د خولې د بد بوی مخنیوی وکړي.
۷. د نعنا ژدوېل
کله چې کومې مېلستیا کې وئ او حس مو وکړ چې خوله مو بد بوی کوي تر ټولو اسانه او غوره لار دا ده چې څو د نعنا پاڼې وژدوېئ دا کړنه به مو د خولې بد بوی په چټکۍ سره له منځه یوسي.
د دې ټولو خوراکونو ترڅنګ ډېر داسې نور خوراکونه او کړنې شته چې کولای شي د خولې بد بوی له منځه یوسي، خو تر ټولو اړینه کړنه د غاښونو پاک ساتل دي، هغه کسان چې له هر ځل خوراک څخه وروسته خپل غاښونه وینځي هېڅکله د غاښونو په درد نه اخته کېږي او خوله یې بد بوی نه کوي، خو د ځینو خلکو خوله د پاک ساتلو تر څنګ هم بد بوی کوي، په داسې حال کې باید ډاکټر ته ورشي او خپله درملنه دې پیل کړي.
