د ګلپپانو روغتيايي ګټې
ژباړه ـ ریاض مقامزی
ګلپيان د هغو سبزیجاتو له ډلې څخه دي، چې د انسان بدن ته ګڼې روغتيايي ګټې رسوي. تاسو به ددې لیکنې ترپایه د ګلپي په اړه هر اړخیز معلومات ولولئ.
لومړی| غذايي ارزښت
د سبزيجاتو، مېوو او خوړو چې څومره غذايي ارزښت لوړ وي هومره یې بدن ته ډېره ګټه رسېږي. په دې معنا چې د بدن د اړتیا وړ مواد پوره کوي؛ نو په همدې خاطر وړاندې له دې چې د ګلپي پر نورو روغتيايي ګټو پوه شو لومړی به یې پر غذايي ارزښت وغږېږو.
ګلپي کمه کالوري انرژي او په لوړه اندازه ويټامینونه لري. د یو سلو اته ويشت (۱۲۸) کیلو ګرامه ګلپيانو غذايي ارزښت په دې ډول ښودل شوی دی.
- کالوري ـ ۲۵
- فایبر ـ ۳ ګرامه
- ويټامین سي C ـ ۷۷ سلنه (RDI)
- ويټامین کا K ـ ۲۰ فیصده
- ويټامين بي شپږ ـ ۱۱ %
- فولات ـ ۱۴ %
- پانتوتِنیک اسید ـ ۷ سلنه
- پوتاشیم ـ ۹ سلنه
- منګنیز ـ ۸ فیصده
- مګنېزیم ـ ۴ %
- فاسفر ـ ۴ سلنه
دویم| د فایبرو غني سرچینه ده
ګلپیان د نورو موادو ترڅنګ د فایبرو غني سرچينې لري. ددې موادو ګټه دا ده، چې د هاضمۍ سیسټم د ښه والي سبب کېږي. د قبضیت، دیورتیکولیت او نورو التهابي ناروغيو مخنیوی هم کوي. له دې سره ـ سره فایبر انسان ته د مړښت احساس ورکوي او په دې توګه د چاغوالي مخنیوی هم کولای شي.
درېيم| انتي اکسیدان لري
د ګلپیانو بله ځانګړنه دا ده، چې په کافي اندازه انتي اکسیدان لري. دا مواد ددې سبب کېږي، چې د ازادو راډيکالونو په مقابل کې د بدن د سلولونو حفاظت او ساتنه وکړي. همدارنګه په کافي اندازه گلوکوزینولات او ایزوتیوسیانات هم لري، چې په بدن کې د سرطاني سلولونو د ودې مخنیوی کوي او په دې توګه د نورو ګټو ترڅنګ د سرطان مخنیوی هم کېږي.
درېيم| د وزن په کموالی کې ګټور ثابتېږي
لکه څنګه چې مو په لومړيو کې یادونه وکړه، ګلپیان په کمه اندازه انرژي (۲۵ کالوري) لري، چې ډېر خوړل یې هم د وزن د ډېرېدو سبب نه کېږي. ددې ترڅنګ فایبر هغه ماده، چې په ګلپیانو کې په پرېمانه کچه موجوده ده. دا ماده، ددې سبب کېږي چې مړښت راولي او د ډېر خوراک مخه ونیول شي. په دې توګه دا چاره هم د وزن د ډېرېدو مخنیوی کوي. له دې سره ـ سره ګلپیانو کې په کافي اندازه اوبه هم موجود دي، چې دا هم په یاده برخه کې ګټور ثابتېږي.
څلورم| د کولين ښه منبع ده!
کولین هغه مهم مواد دي، چې په بدن کې د مېتابولېزم له پروسې سره مرسته کوي. په بدن کې ددې مادې کمښت د عصبي کمزورۍ او د زړه د ناروغيو سبب کېدای شي. نو که غواړئ د زړه له ناروغیو، عصبي کمزورۍ په ځانکړې توګه له الزایمر څخه په امان کې شئ، نو پخپل غذايي رژيم کې ګلپیانو ته حتما ځای ورکړئ.
له دې ټولو ګټو ورهاخوا د ګلپيانو له ځينو نورو روغتيايي فوایدو څخه په دې توګه یادونه کوو.
- په ګلپيانو کې په کافي اندازه سولفورفان هم شته، چې د سرطان مخنیوی کولای شي.
- په دې سبزیجاتو کې شته غذايي مواد دومره ګټور دي، چې د حبوباتو پر ځای هم کارېدلی شي. او هغو کسانو ته له حبوباتو څخه ډېر ګټور تمامېدای شي چې کم کاربوهایډرايټ کاروي. دا ځکه چې د حبوباتو پر نسبت ګلپي په کمه اندازه کاربوهايډرايټ لري.