لیکنه: شکېبانادري، د نړۍ اووه حیرانوونکي ځايونه
وروستۍ برخه
لکه څنګه چې تاسو ته معلومه ده چې موږ په تېرو لیکنو کې د نړۍ د اوو حیرانونکو ځایونو په اړه معلومات وړاندې کړل لکه، د چین دېوال، تاج محل، د پېټرا ښار او داسې نور، خو په دې لیکنې کې د مسېح د مجسمې په اړه چې د نړۍ له اوو حیرانونکو ځایونو څخه یو دی او زموږ د لیکنې وروستۍ برخه ده، تاسو ته معلومات وړاندې کوو، هیله ده چې زموږ دا لیکنه ستاسو په معلوماتو کې د زیاتوالي لامل شي!
د مسېح مجسمه چې د برازیل هېواد په ریوډوژانیرو ښار د کورکوواډو غره پر سر موقعیت لري، د دې مجسمې د جوړولو لپاره بېلابېلې نظریې وړاندې شوي، خو پر دې یې پرېکړه وکړه چې دا مجسمه باید د درېدو په حالت کې جوړه شي، په همدې حالت جوړه شوه او لاسونه یې خلاص نیولي دي، مسیحیان په دې اند دي چې دغې مجسمې ځکه لاس خلاص نیولي چې غواړي ټول خلک په خپله غېږ کې ونیسي، د دغې مجسمې د جوړولو کار چې په 1920کال کې پیل شو، یوولس کاله وروسته یې د جوړولو کار پای ته ورسېد.
د مسیح د مجسمې لوړوالی تر 39.6 مېټرو پورې او اوږدوالی یې تر 28 مېټرو پورې رسېږي، دا مجسمه 635 ټونه وزن لري او د برازیل هېواد تر ټولو مشهوره نښه همدا مجسمه ده.
دا مجسمه د نړۍ په پینځو لویو مجسمو کې شمېرل کېږي، د دې مجسمې د جوړولو لګښت چې تر 250 زرو ډالرو پورې رسېږي او دا لګښت د برازیل د کاټولیکو ټولنې له خوا ورکړل شوی و.
د دې مجسمې د جوړولو کار په 1231 کال کې خلاص شو او دا مجسمه د اکټوبر په دوولسمه نېټه په رسمي توګه پرانستل شوه.
دا مجسمه ټوټې ټوټې جوړه شوې ده او له بشپړېدو څخه وروسته غره ته یوړل شوه او هلته یې دا ټوټې سره یو ځای کړې او یوه بشپړه مجسمه یې ترې جوړه کړه.
د دې مجسمې ښي لاس د سوېل لور ته او چپ لاس یې د شمال لور اشاره کړې ده.
دا مجسمه د جولای میاشتې په اوومه نېټه د نړۍ په اوو حیرانونکو ځایونو کې وشمېرل شوه
لیکنه: شکېبانادري.
