لیکنه: شکېبا نادري، د محمد شهزاد محمدي پېژندګلوي
د افغانستان د کرېکټ د ملي لوبډلې هر یو لوبغاړی د نړۍ په کچه پېژندل شوې څېرې دي، د افغانستان د ملي لوبډلې لوبغاړي سربېره پر افغانستان په ټوله نړۍ کې ځانګړي مینه وال لري، ان تر دې چې د نړۍ له ګوډ ګوډ څخه خلک د دوی لیدو او لوبو ته ورځي، ورسره انځورونه اخلي، لاسلیکونه یې اخلي او له دوی سره لیدنه ورته یو ویاړ ښکاري، افغانان خو بیا د هر لوبغاړي لیدو ته دومره لېواله دي چې حد نه لري، خو له بده مرغه چې زموږ د هېواد امنیتي حالت داسې نه دی، چې لوبغاړي دلته ډېر و اوسي، نو لیدل یې لږ څه ستونزمن دي.
موږ په نننۍ لیکنې کې تاسو ته د محمد شهزاد محمدي په اړه معلومات درکوو، که تاسو هم د شهزاد محمدي له مینه والو څخه یاست او غواړئ په اړه یې معلومات تر لاسه کړئ، زموږ دا لیکنه تر پایه ولولئ!
شهزاد محمدي د افغانستان د ملي لوبډلې هغه لوبغاړی دی چې په ښي لاس توپ وهنه کوي او یو ویکټ ساتونکی لوبغاړی هم دی.
شهزاد محمدي د ۱۹۷۸ کال د جنوري په لومړۍ نېټه په ننګرهار ولایت کې زېږدلی دی، د شهزاد ونه پینځه فوټه او درې انچه ده.
د شهزاد محمدي لوبې
شهزاد خپله لومړۍ یو ورځنۍ نړيواله لوبه د هالنډ پر وړاندې ترسره کړه، په شل اوریزو نړیوالو لوبو کې یې بیا لومړۍ لوبه د اېرلنډ پر وړاندې تر سره کړې ده او په شل اوریزو لوبو کې یې هم خپله لومړنۍ لوبه د اېرلنډ پر وړاندې تر سره کړې ده.
محمد شهزاد محمدي په کومو لوبډلو کې لوبې کړې دي؟
ښاغلي شهزاد په بېلابېلو لوبډلو کې لوبې کړې دي لکه، د افغانستان په ملي لوبډله کې، په A لوبډله کې او زموږ په کورنیو لیګونو کې لکه، شپږیزه او د افغانستان غوره لیګ (اې. پي. اېل) سربېره پردې شهزاد په نړیوالو لیګونو کې هم ګډون کړی دی لکه، د پاکستان سوپر لیګ په پشاور زلمي لوبډله کې، د بنګلدېش په غوره لیګ کې او داسې نورو لوبډلو کې لوبېدلی دی.
په بېلابېلو لوبو کې د شهزاد محمدي د منډو شمېر
شهزاد ۸۴ یو ورځنۍ نړیوالې لوبې تر سره کړې دي او په دې لوبو کې یې ۲۷۲۷ منډې کړې دي، په دغو یو ورځنیو لوبو کې یې په یوه لوبه کې تر ټولو ډېرې منډې ۱۳۱ ناسوځېدلې منډې دي،
۷۰ شل اورېزوې نړیوالې لوبې یې تر سره کړې دي او ټولې منډې یې ۲۰۱۵ دي او په یوه لوبه کې یې ډېرې منډې ۱۱۸ ناسوځېدلې منډې دي. په ټوله کې محمد شهزاد ۱۳۵ شل اوریزې لوبې کړي دي او منډې یې ۳۹۲۱ دي، خو په یوه لوبه کې یې ډېرې منډې ۱۱۸ ناسوځېدلې منډې دي او دوې ټېسټ لوبې یې هم کړې دي، په ټوله کې یې د منډو شمېر ۶۹ دی او په یوه لوبه کې ډېرې منډې ۴۰ دي.
په نړیواله کچه د محمد شهزاد محمدي ریکارډونه
۱. شهزاد محمدي په نړیواله یو ورځنۍ لوبه کې ۱۰۰ منډې کړې دي او ۴ ویکټې(کېچ،سټمپ او ...) یې د ویکټ ساتونکي په توګه اخیستې دي.
۲. شهزاد محمدي په شل اوریزو نړیوالو لوبو کې هم پینځه ویکټې د ویکټ ساتونکي په توګه اخیستې دي.
