لیکنه ـ ریاض مقامزی
د "۲۰۲۱ز" کال د کریکټ د شل اوریزو لوبو نړېوال جام بېګاه شپه پای ته ورسېد. ددې لوبلړۍ په ورستي پړاو کې د افغانستان په ګډون د دولسو "۱۲" هيوادونو لوبډلو برخه اخیستې وه، چې په پایلوبه کې اسټرالیا او نیوزلینډ سره مخامخ شول. اسټرالیا وکولای شول په دې لوبه کې بریا خپله کړي او ددې کال اتلولي پخپل نوم ثبت کړي. خو په دې ټوله لوبلړۍ کې ځينو لوبغاړو وکولای شول تر نورو ډېرې منډې جوړې کړي، چې له ډلې یې د پنځو مخکښو لوبغاړو نومونه په دې ډول دي.
لومړی| بابر اعظم
د پاکستانۍ لوبډلې پیاوړي لوبغاړي "بابر اعظم" په دې ټورنمینټ کې تر ټولو ډېرې منډې جوړې کړې. بابر اعظم وکولای شول په شپږو لوبو کې "۳۰۳" منډې ترلاسه کړي او په دې توګه یې د ډېرو منډو جوړونکو لوبغاړو په نوملړ کې لومړی ځای خپل کړ. د منډو په دې ټولګه کې ۴ نیمه سلیزې هم موجودې دي او په یوه لوبه کې یې لوړې منډې "۷۰" دي.
دویم| ډيویډ وارنر
د اسټرالیا د کریکټ ملي لوبډلې پیاوړی پیلیز لوبغاړی "ډيويډ وارنر" په دې نړېوال جام کې دویم لوبغاړی شو، چې تر نورو یې ډېرې منډې جوړې کړي دي. نوموړی په "۷" پاڼيو (انینګز) کې ولوبېد او "۲۸۹" منډې یې جوړې کړې. په یوه پاڼۍ کې یې لوړې منډې (Runs) نهه اتیا "۸۹" دي. همدارنګه په ټولو لوبو کې یې اوسط "۴۸" منډې کېږي.
درېيم| محمد رضوان
ورپسې د پاکستانۍ لوبډلې بل بریدګر لوبغاړی "محمد رضوان" په دې نوملړ کې درېيم مقام لري. نوموړي په شپږو پاڼيو کې د "۴۶،۸۳" منډو په اوسط لوبې وکړې او ډېر ښه وځلېد. په دې نړېوال جام کې یې د ټولو منډو مجموعه "۲۸۱" ده.
څلورم| بټلر
په څلورم مقام کې بیا د انګلستان هېواد پیاوړی لوبغاړی "جوز بټلر" دی. بټلر وکولای شول د "۲۶۹" منډو په جوړولو سره د پیاوړو لوبغاړو په دې لیست کې څلورم ځای خپل کړي. البته دا منډې يې په شپږو انینګزونو کې ترسره کړي دي. د بټلر د منډو اوسط "۴۴،۸۳" کېږي.
پنځم| اسلانکا
د "۲۰۲۱ز" کال نړېوال جام د ډېرو منډو جوړونکو لوبغاړو په نوملړ کې پنځم نوم د سریلینکایي لوبغاړي "اسلانکا" دی. نوموړي د اته دېرش نیمو "38.5" منډو په اوسط سره لوبې کړي دي، چې د منډو مجموعه یې "۲۳۱" ته رسېږي.
