لیکنه: شکېبا نادري، د خپل راتلونکي ګډ ژوند د ملګري/ې په ټاکلو کې دغو ټکو ته پام وکړئ!
هر هلک او نجلۍ حق لري چې له واده نه مخکې خپله مېرمن او يا خاوند وويني او هغه د خپل راتلونکې مېرمنې او يا خاوند په توګه ومني او يا یې ونه مني. همدارنګه يو هلک او نجلۍ کله چې له واده نه وړاندې يو بل ويني باید ځينو ټکو ته پام وکړي، تر څو په راتلونکي کې هغوی او د هغوی ګډ ژوند له ستونزو سره مخ نه شي. موږ په نننۍ لیکنې کې غواړو تاسو ته ځينې هغه ټکي در په ګوته کړو چې په ترسره کولو یې کولای شئ، خپله راتلونکې مېرمن او يا خاوند وټاکئ. که غواړئ په دې اړه معلومات ترلاسه کړئ، لیکنه تر پايه ولولئ!
لومړی_ له واده نه وړاندې له خپل مقابل لوري سره ووينئ!
که د ژوند په داسې پړاو کې شتون لرئ چې غواړئ خپل راتلونکی خاوند او يا مېرمن وټاکئ او کورنۍ مو تاسو ته د واده لپاره يوه غوره نجلۍ او يا يو ښه هلک ټاکلی دی، وړاندې تر دې چې له هغه/ې سره کوژده وکړئ، خپلې او د مقابل لوري کورنۍ ته قناعت ورکړئ چې باید له کوژدې نه مخکې يو ځل هغه هلک/نجلۍ ووينئ. تر څو وکولای شئ څو شېبې له هغه/ې سره وغږېږئ او په ګډه د د کوژدې کولو پرېکړه وکړئ.
دویم ــ د واده لپاره داسې کس وټاکئ چې ور سره د خپلوۍ اړیکه و نه لرئ!
واده کول د یوې ورځې، میاشتې او کال خبره نه ده، دا هغه پرېکړه ده چې ستاسو د ټول عمر سره اړیکه لري، له خپلوانو سره واده کول د طب له پلوه دومره د منلو وړ نه ده یعنې ډاکټران وایي چې په خپلوانو کې واده کول د ځینو ستونزو لامل کېږي، تاسو به هم لیدل وي ډېری هغه کسان چې له خپلوانو سره یې ودونه کړي دي بې اولاده دي او که یې اولادونه زېږېدلي هم دي ارومرو یوه ستونزه لري.
درېیم ــ عمر یې باید له تاسو سره لږ توپیر ولري
تاسو د واده لپاره داسې کس وټاکئ چې د عمر واټن مو ور سره کم وي، د خاوند او مېرمنې د عمر توپیر د بېلابېلو ستونزو لامل کېدلای شي، ځکه ښځې د نارینه وو په پرتله ژر زړېږي، نو اړینه ده چې تر منځ یې توپیر لږ وي، ځکه هغه کسان چې د عمر واټن یې کم وي، د یو بل په خبره پوهېږي، یو بل ښه درک کوي او د یو او بل په ستونزو ښه پوهېدلای شي.
څلورم ــ له ښې کورنۍ یې وټاکئ
دا تل په یاد ولرئ، هغه کورنۍ چې ښه وي، هېڅکله یې اولادونه نه شي بدېدلای، نو د واده لپاره داسې کس وټاکئ چې له ښې کورنۍ څخه وي.
پینځم ــ له خپل هم سویه سره واده وکړئ
هېڅکله د واده لپاره داسې کس مه وټاکئ، چې سویه یې یا له تاسو ډېره جیګه وي او یا یې له تاسو نه سویه ټېټه وه، په دې دواړو حالاتو کې د انسان ژوند له ستونزو سره مخ کېږي، ځکه یوه پیسه داره نجلۍ هېڅکله د یو غریب هلک سره ژوند نه شي کولای، هغه تمې چې یوه پیسه داره نجلۍ یې لري یو غریب هلک یې هېڅکله نه شي ورته پوره کولای همدا لامل کېږي چې په ژوند کې یې ستونزې پیدا کېږي. حضرت مُحَمَّد ﷺ هم په دې اړه فرمایلي چې له خپل هم سویه سره واده وکړئ.
اسلام د برابرۍ دین دی، موږ ته خدایﷻ او د هغه رسولﷺ د دې اجازه راکړې چې د خپل ژوند د جوړولو لپاره ځان ته یو کس وټاکو، خو په دې شرط چې دا کس اسلام او شریعت په اصولو برابر کس وي.
