د غوره سلفي اخیستو لپاره باید څه وکړو؟
1,218
imranghani
2021-12-10 02:09:02
لیکنه: شکېبا نادري، د غوره سلفي اخیستلو لپاره باید څه وکړو؟
په اوس مهال کې د ټولو انسانانو که هغه هلکان وي، که نجونې او یا مشران عکسونه اخیستل یې خوښېږي، خو دا څرګنده خبره ده چې د مشرانو په پرتله د ځوانانو علاقه له سلفي اخیستلو سره څو برابره زیاته ده، ځوانان که هغه نجونې وي او که هلکان، غواړي د خپل هر حالت انځورونه واخلي او خواږه یادونه ترې پاتې شي.
که تاسو هم غواړئ ښایسته او زړه راښکونکې سلفي واخلئ، نو زموږ دا لیکنه تر پایه ولولئ او یادې کړنې پلې کړئ!
۱. روښنایي
د سلفي لپاره مناسبه روښنایي تر ټولو اړین توکی دی، کله مو چې غوښتل سلفي واخلئ، په داسې ځای کې یې واخلئ، چې مناسبه روښنایي پکې وي په تیاره او سیوري کې هېڅکله سلفي سمه نه راځي.
۲. رښتنې خندا
د سلفي لپاره تر ټولو اړین توکی رښتنې خندا ده، خندا د هر عکس د ښکلا لامل کېږي، خو په دې شرط چې رښتنې وي، مصنوعي او دروغجنه خندا زموږ سلفي ته ښکلا نه شي وربښلی برعکس، زموږ د انځور ښکلا له منځه وړي.
۳. ډېره سلفي واخلئ!
که غواړئ چې غوره سلفي واخلئ، نو باید ډېره یې واخلئ د ډېرو سلفیانو په اخیستلو یو انځور تر بل جذاب راځي، غوره یې وټاکئ او ناسم یې لرې کړئ.
۴. مناسبه زاویه
د غوره سلفي اخیستونکي یوه ځانګړنه دا ده، چې باید د سلفي اخیستلو پر مهال مناسبه زاویه په نظر کې ونیسي او له همغې ځای او لوري څخه انځورونه واخلي، لکه د سلفي اخیستلو پر مهال باید موبایل ډېر ښکته ونه نیول شي، ځکه ښکته نیول د سلفي د خرابوالي لامل کېږي او انځورونه خراب راځي.
۵. انځور مه اېډیټ کوئ!
دا سمه ده چې د ځینو فلټرونو او سټېکرو کارول ښه ښکاري، خو د انځور له حده ډېر اېډیټول د انسان طبیعي ښایست له منځه وړي او سلفي یې خرابوي.
۶. له تکراري اکټونو لرېوالی وکړئ!
که غواړئ چې ښایسته سلفي واخلئ، نو له تکراري اکټونو ځان لرې وساتئ، هڅه مه کوئ چې د اریانا سعید په څېر خپلې شونډې ونیسئ او یا د اجمل حقیقي په څېر یوه پښه پورته او بله ښکته کړئ او انځور واخلئ، تکراري اکټونه مو د سلفي جذابیت له منځه وړي.
۷. کمره مو مخ ته ډېره مه نږدې کوئ!
د سلفي اخیستلو پر مهال هڅه وکړئ، کمره مو له مخ څخه لرې ونیسئ، ځکه د کمرې د نږدېوالي په صورت کې ستاسو مخ لوی او خراب راځي.
کېدای شي د دې تر څنګ د سلفي د اخیستلو نور تخنیکونه هم شته وي، خو د یادو ټکو په ترسره کولو سره هم کولای شو غوره سلفي واخلو.
