د روژې مبارکې میاشتې فضیلتونه

د روژې مبارکه میاشت د اسلام له پنځه بنأوو:

( ۱- کلیمه | ۲- لمونځ | ۳- روژه | ۴- زکات | ۵- حج‌ ) څخه درېمه بنأ (بنسټ) او د هجري قمري کال: ( ۱-محرم الحرام، ۲-صفر المظفر، ۳-ربیع الاول، ۴-ربیع الثاني، ۵-جمادي الاول، ۶-جمادي الثاني، ۷-رجب المرجب، ۸-شعبان المعظم، ۹-رمضان المبارک، ۱۰-شوال المکرم، ۱۱-ذې القعده، ۱۲-ذې الحجه) نهمه میاشت ده. د روژې مبارکه میاشت په اسلامي نصوصو (په قرآن العظیم الشان او احادیثوشریفو) کې ثابته ده. د روژې مبارکې میاشتې نیول په ټولو مسلمانانو فرض ده مګر په ناروغانو اوڅوک چې په سفر کې وي او د هغوی لپاره ځانکړې شرایط شتون لري. او قضايي ادأ کول یې پرې شته دي. د روژې مبارکه میاشت په درېو برخو وېشل شوې ده چې لومړۍ برخه یا لس ورځې یې رحمت، دوېمه برخه یا لس ورځې یې مغفرت (بخښنه) او درېمه برخه یا لس ورځې یې د دوزخ له عذاب او اور څخه خلاصون دی. د روژې مبارکه میاشت وېل کیږي: د مسلمان لپاره د یوولسو نورو میاشتو زکات ده چې روغتېا او صحت ته یې ډېرې زیاتې ګټې لري. دنیایي ګټې یې د روغتېا او صحت ښه کېدل کېدلای شي. د آخرت ګټې یې بې شمېره اجرونه او ثوابونه دي چې الله (ج) مسلمانانو ته یې ور په برخه کوي. روژه د الله (ج) له لورې مسلمانانو لپاره د میلمستېا میاشت ده.  

د روژې میاشتې ډَولونه:

د روژې میاشت په دوه ډَوله ده:

۱- عامه روژه      ۲-ځانګړې (خاصه) روژه

۱- عامه روژه: هغه روژه ده چې پکې یوازې خوراک او څښاک نه کیږي، دې ډَول روژه کې روژه نیونکي یوازې له خوراک او څښاک څخه ځانونه یې منع کړي وي او نور هر څه چې یې زړه غواړي هغه ترسره کوي.

۲- ځانکړې (خاصه) روژه: هغه روژه ده چې پکې د خوراک او څښاک له منع کېدلو ترڅنګ د روژه نیونکو د بدن ټول غړي لکه سترګې، غوږونه، لاسونه، پښې او نور. . . ټول روژه وي. یو شمېر دیني عالمان او پوهان یو بل ډَول روژه چې د اخص الخاص که د اختص الخاص په نوم ده دا هم یادوي پدې کې وایي: “چې د ځانګړې روژې د ځانګړتیاوو ترڅنګ د مسلمان زړه په یوه ځانګړې او خاصه اړیکه او رابطه کې د الله (ج) سره وي. “ پدې روژې زه هم نه پوهیږم چې څه ډَول روژه ده؟

د روژې مبارکې میاشتې یو شمېر فضیلتونه:

•     د کال تر ټولو غوره میاشت ده ځکه قرآن العظیم الشان پکې نازل شوی دی
•     د قرآن کریم او نورو آسماني کتابونو او صحیفو نازل کېدل پدې میاشت کې
•     لیلة القدر (د قدر شپه چې د زرو ۱۰۰۰ میاشتو څخه غوره شپه ده) د دې شپې شتون پدې میاشت کې
•     مادي او جسمي ګټې (د انسان د وجود بېلابېلې ناروغۍ ښه کېدل پدې میاشت کې)
•     معنوي او روحي ګټې (تقوا، پرهیزګارۍ او روحي آرامتیا ته رسېدل پدې میاشت کې )
•     د مسلمانانو د ګناهونو سوځېدل او بخښل کېدل پدې میاشت کې
•     د شیطانانو تړل کېدل، د انسي او جني شیطانانو له وسوسو څخه خلاصون پدې میاشت کې

د روژې لفظي تعریف:

روژه (رمضان) د [ رمضأ ] عربي کلیمې څخه اخیستل شوې ده چې د تودوالي، حرارت او سوځېدلو په مانا ده؛ یانې پدې میاشت کې د انسانانو او مسلمانانو ګناهونه بخښل کیږي. خدای (ج) دې زمونږ او تاسو او د ټولو مسلمانانو روژې په خپل دربار کې قبولې کړي؛ آمین.

مننه؛ بریالي اوسئ.

؛؛؛ عبدالرشید صمد نجاب ؛؛؛