لیکنه او راټولونه: شکېبا نادري
په روژه کې څنګه د سر درد او ګنګسوالی له منځه یوسو؟
دا ښکاره خبره ده چې د روژې نیول اسانه کار نه دی، خو روژه د اسلام له پینځو بناوو څخه یوه بنا ده، چې د اللهﷻ لخوا په مسلمانو فرض شوې او ټول مسلمانان یې پر نیولو مکلف دی.
د روژې او روژه نیوونکې د اجر او ثواب په اړه ډېر ایتونه او احادیث نازل شوي دي او ټول مسلمان یې له فضیلت څخه خبر دي.
د روژې نیولو ثواب ځکه تر نورو عبادتونو ډېر دی چې روژتي د ورځې په اوږدو کې له ځینې ستونزو سره مخ کېږي لکه ګنګسوالی، سر درد، د معدې درد او داسې نور.
موږ په نننۍ لیکنه کې تاسو ته په دې اړه معلومات درکوو چې څنګه په روژه کې خپل د سر درد او ګنګسوالی له منځه یوسو؟
که تاسو هم غواړئ په دې اړه پوه شئ زموږ لیکنه تر پایه ولولئ!
لېمو د هغو مرکباتو له ډلې څخه دی چې بې شمېره ګټې لري، لېمو د ویټامین سي سرچینه ده او ویټامین سي د انسان د بدن د پیاوړتیا لامل کېږي او کمښت یې په بدن کې د بېلابېلو ناروغیو لامل کېږي.
د تروه لېمو اوبه د هغو کسانو لپاره یوه معجزه ده چې د روژې نیولو له امله یې د بدن بېلابېل غړي او په ځانګړي توګه سر درد کوي.
زیات وخت ډېره لوږه د سر دردۍ لامل کېږي، هغه کسان ډېری له دغه حالت سر مخ کېږي چې د معدې ناروغي ولري.
ډېری وخت د بدن د اوبو کمېدل هم د دې لامل کېږي چې د انسان سر درد وکړي، د لېمو اوبه کولای شي چې زموږ سردردي له منځه یوسي. سر بېره پردې د ډوډۍ په هضمولو کې هم مرسته کوي، خو پام مو وي چې هېڅکله په تشه معده لېمو ونه خورئ. کله مو چې د سر درد زیاتېده نو د تروه لېمو اوبه مو په ستوني او ټنډه وهئ، ډېر ژر به مو د سر درد او ګنګسوالی له منځه یوسي.
سر بېره پردې د تروه لېمو خوړل مو اشتها هم زیاتوي او د دې لامل کېږي چې ډېر خواړه وخورئ او د لوږې پر وړاندې مقاومت وکړئ.
