د قدر شپه کله ده؟
449
Faridon Delsoz Niazai
2023-04-10 12:06:09
ددې شپې د فضیلت په اړه به نه ږغېږم، ځکه د فضیلت په اړه ئې د قرآن همدا یو آیت کفایت کوي: "د قدر شپه له زرو میاشتو څخه ډېره غوره ده"
زه به پر دې بحث وکړم، چي کله ده او کوم اعمال باید وکړو.
د قدر شپه #کله ده؟
دا شپه الله جل شانه د روژي په اخيرو لسو شپو کښي و ټاکل ځکه بنده ګان د روژي و اخير ته ستړي وي او ډېرو عباداتو کمزوري کړي وي، نو بنده ګان به ځکه په دا لسو شپو کښي عبادت ډېر وکړي تر څو د قدر د شپې له انوارو څخه برخمن سي.
او په دا لسو شپو کښي بیا د طاق شپه ده، ځکه د رسول الله حدیث دئ، چي د قدر شپه د روژې په اخرو لسو شپو کي په طاق شپه ده.
داچي په طاقو شپو کښي د کومي شپې احتمال ډېر دى، په دې هکله حضرت عبدالله بن عباس رضی الله عنه فرمايي: چي د اوويشتم شپه د قدر شپه ده. که وکتل سي په سورة القدر کښي د ليلة القدر الفاظ درې واري راغلي دي او الفاظ د ليلة القدر که حساب کړل سي نهه (٩) حروف دي، اوس که د الفاظو تعداد د حروفو په تعداد کي ضرب کړو نو به اوويشت (٢٧) سي. يعني (٣×٩=٢٧) نو د اوويشتم شپه د قدر ده او الله جل شانه خپله راوښودل.
د روژې اوويشتم شپه د قدر د شپې زيات احتمال لري او علماء کرام بل دليل دا وړاندي کوي چي د عثمان بن ابى العاص يو مريي وو، چي د شپې پيره داري به ئې کول، ده و خپل بادار عثمان بن ابى العاص ته وويل چي نه پوهيږم په کال کي يو وار د دا درياب تروي او ترخي اوبه د شربتو په شان خوږې سي. عثمان بن ابى العاص ورته وويل: که سږ کال پر پېښ سوې ما هم په خبر که.
يو شپه مريي د اوبو خوند وکتى چي د شربتو په شان خوږې دي نو ئې پر بادار هم ږغ وکړى. عثمان بن ابى العاص کيسه کوي چي اوبه تر خپله حده خوږې وې او ما چي حساب و کړ دا شپه د اوويشتم شپه وه.
#نوټ: مولانا زکریا رحمة الله فرمایي: چي اخري لس شپې ټوله و عبادت ته ورکړئ، ځکه یو خو په طاقو شپو کي د قدر شپه نه ده معلومه او بل که میاشت نهه ویشت شپې سي، نو طاق شپې جپت او جپت شپې طاق راځي. داچي دا د فضیلت شپه ده، نو د ثواب څخه د برخمن کېدلو لپاره که لس سره شپې عبادت وسي، نو غوره ده.
کوم #اعمال وکړو؟
په دې شپه کي د اعمالو لپاره ټاکلی وخت نسته، ټوله شپه د قدر وي؛ که هر وخت کي ئې عبادت کولای سی، نو وې کړی.
که د ټوله شپې عبادت توان وي، خو وې کړی او که د ورځي مصروفیت لری، نو هم عبادت وکړی او خوب وکړی.
غوره اعمال د قرآن تلاوت، تراویح، صلواة التسبیح او تهجد لمونځونه، درود ویل، ذکر کول او دعاګاني غوښتل دي.
الله جل شانه دي ددې شپې تر څنګ د ژوندانه د هري شپې او هري لحظې د عبادت توفيق راکړي. اللهم امين
