په ټولنیز ژوند کې نږدې هر انسان د ښه شخصیت، محبوبیت او درنښت غوښتونکی وي. زموږ او ستاسو په شمول ټول وګړي غواړي، چې خلک یې ښه ووایي، ویې ستايي او ورته ته ګران دې وي. مګر بیا هم ځينې عادتونه او کړنې شته، چې نورو ته یې بدمعرفي کړي او درنښت یې کم کړي. داسې کړنې ممکن بېخي ډېرې وي، خو دلته یې یوازې پر ځینو ډېرو عامو خبرې شوي دي.
لومړی ـ احترام
وايي "که غواړې محترم شې، نو اول نور محترم وګڼه"، خو که د نورو احترام نه کوئ، هیڅوک به هم ستاسو درنښت ته قایل نه شي. همدا حقیقت دی.
که غواړې ټولنیز محبوبیت مو پر ځای پاتې وي، ټولو وګړو ته په درنښت قایل شئ. کشر، مشر، ښځه، نر، خان، غریب او بل هرڅوک چې وي، یو انسان دی او انسان د قدر وړ دی.
لکه څنګه چې موږ د ښه شخصیت غوښتونکي یو، همداسې هر انسان ځان یو شخصیت بولي. نو د نورو شخصیت ته درناوی ولرئ، ترڅو ستاسو درنښت هم وشي.
دویم ـ رازساتونکي اوسئ
هغوی چې راز نه شي ساتلی ډېر ژر د نورو له سترګو غورځي. هڅه وکړئ، راز ساتونکي اوسئ. که تاسو د ملګرو راز نه شئ ساتلای، نو لومړی مو خپل ملګري پر تاسو بې باوره کېږي او ورو ـ ورو دا عیب مو ټولې ټولنې ته معلومېږي. که تاسو هم دا عیب لرئ، ژر تر ژره یې د حل په اړه فکر وکړئ.
درېيم ـ غوږ نيونکي اوسئ
ځینې خلک یوازې خپله وايي او د مقابل لوري نه اوري. دا ډول خلک نورو ته دا څرګندوي چې ارزښت ورته نه لري، او دا طبیعي خبره ده، چې انسان مقابل لوري ته په کتو خپل دريځ ټاکي. که تاسو غوږ نيونکي انسانان نه یئ، ډېر ژر به نور خلک له تاسو متنفر شي.
هڅه وکړئ، د خبرو په جریان کې مقابل لوري ته په غوږ نیولو سره هغه ته د ارزښت احساس ورکړئ. په ټولنیز ژوند کې خبرې کول او اورېدل عادي چاره ده، خو اصلا ښه ویل او ښه اورېدل دواړه مهارتونه هم دی. که ښه اورېدونکي شئ ښه ویونکي کېدای هم شئ.
څلورم ـ ډېرې خبرې مه کوئ
له ډېرو خبرو یوازې موخه دا نه ده، چې تاسو دې یوازې په مجلس کې کم وغږېږئ، بلکې په موبایل او یا دريځ کې غږېدل هم باید په اندازه وي. که په مجلس، موبایل او یا هم دریځ کې ډېر وغږېدئ د نورو په ذهن کې خپل ناسم انځور مو جوړ کړ. هڅه وکړئ اعتدال ته پام وکړئ. په مجلس کې د خپلو خبرو ترڅنګ نورو ته هم وخت ورکړئ، چې خپل نظر څرګند کړي. په دريځ کې هم تر ټاکلي وخته ډېر مه غږېږئ، که تر خپل ټاکلي وخته ډېر وغږېدئ یعنې د بل حق مو وخوړ، همدارنګه اورېدونکي هم ستړي کوئ. په موبایل کې اوږدې خبرې د روغتيايي ستونزو ترڅنګ ستاسو ټولنیز محبوبیت هم له منځه وړي. ځکه ملګري مو فکر کوي، هغوی ته ارزښت نه لرئ.
پنځم ـ ډېره پلټنه مه کوئ
ځينې خلک تل هڅه کوي د نورو په اړه پوه شي. دوی ډېرې پوښتني کوي او مقابل لوری په تنګوي. له دې کاره په قران کریم کې هم منع شوې ده. الله "ج" فرمايي: ولا تجسسو! یعنې پلټنه مه کوئ.
دا کار د اسلامي حکم ورهاخوا نزاکتاً هم نامناسب کار دی. ممکن تاسو داسې پوښتنې وکړئ، چې مقابل لوری نه غواړي په اړه یې وغږېږي. نو په دې ډول تاسو نوموړي ته یو بد احساس ورکوئ.
داسې ګڼې نورې کړنې هم شته، چې ستاسو شخصیت او ټولنیز محبوبیت ته تاوان رسوي، چې په راتلونکو نورو لیکنو کې به پرې مفصلې خبرې وشي.
