کتابتون ویبسايټ د خپلو ګټورو لیکنو په لړ کې دا ځل د "ماشومانو روزنه" تر سرلیک لاندې د لیکنو لړۍ پيلوي. ددې لړۍ په لومړۍ لیکنه کې به زده کړئ، چې ماشوم څنګه له مطالعې سره علاقه پیدا کړي.
له مطالعې سره د ماشومانو علاقه
لومړی اړینه ده چې پوه شئ، ماشومانو ته په ډېر ویلو سره (چې درس ووایه، کتاب ولوله) د دوی شوق له کتاب سره نه ډېریږي. همدارنګه که له شدت او سختۍ نه ورسره کار واخلو مثلا غصه کېدلو، خفه کېدلو، وهلو او رټلو یا داسې نور نو ممکن د دوی شوق له مطالعې سره کم شي خو ډېر نه.
نو باید څه وکړو؟
دا تل یې په یاد ولرئ،
لومړی: ماشوم هغه وخت مطالعې او کتاب سره شوق پیدا کوي، کله چې د کورنۍ غړي په خاصه توګه پلار او مور د مطالعې شوق ولري. مثلاً که پلار یا مور خپله مطالعې ونه کړي، نو له اولاد څخه دې هم دا تمه نه لري، چې حتمي دې مطالعه وکړي. ځکه هغوی له دوی الګو او مثال اخلي. هغه کورنۍ چې لوستي (باسواده) کسان نه لري یا خپله دوی (پلار او مور) لوستي نه وي، نو دوی ته توصیه دا ده چی د خپل ماشوم په پار د ځینې وخت کتاب لاس کې اخلي. یا دې هم ځینې سوالونه ورته که څه هم زده یې وي د کتاب په خلاصولو سره ځواب کړي، یعنې ماشوم باید پلار او مور په لاس کې کتاب وویني او ماشوم باید پوه شي، چې که پلار او مور یې لوستي هم نه دي؛ خو شوق یې لري او عمل کی یې هم باید ورته وښایي.
دوهم: د کور او کورنۍ محیط کې باید مطالعې ته وخت ورکړل شوی وي. یعنې که په کور کې د کورنۍ ټول غړي په ساعتونو تلویزیون ته ګوري خو حتی نیم ساعت هم د مطالعې لپاره نه پاڅېږی او وخت نه ورکوي نو تمه مه لرﺉ چه د داسې کورنۍ ماشوم دې د مطالعې او کتاب اهل واوسي.
- نور مهم ټکي
داسې مکوﺉ!
چې تاسې تلویزیون یا موبایل سره بوخت یاست او ماشوم ته ووایئ، چې ورځه هغه بله کوټه کې درس ووایه!
داسې وکړﺉ!
- بیا هم وایو که ماشوم یو سوال وپوښتي که څه هم په ځواب یې پوهیږئ؛ خو د یو کتاب له خلاصولو نه وروسته یې ورته ځواب کړﺉ. تر څو هغوی پوه شي چې کتابونو کې هر ډول موضوعاتو شته او دوی هم خپلې پوښتنی هلته ځواب کولای شي.
- په سهار یا ماښام کې یو ساعت د ټولو لپاره د مطالعې ساعت وټاکئ، هغه وخت کې دې د کورنۍ هر غړی کتاب راواخلي، که څوک لوستي وي یا نالوستي.
- په کور کې کتابونه باید موجود وي او لاسرسۍ ورته آسانه وي.
- ماشومانو ته په شوق، لوړ آواز او ښکلی لهجه کتاب لولئ.
- ماشومان کتاب پلورنځیو ته بیایئ او ښه کتابونه ورته اخلئ.
ددې لړۍ په بله لیکنه کې د ماشومانو اړوند پر کومه موضوع پوهېدل غواړئ؟
خپل نظر کمینټ کې پرېږدئ، ترڅو موږ پرې لیکنه چمتو کړ.
لیکنه: لیمه دلیل
