لیکنه ـ ریاض مقامزی
بیرغ په نړېواله کچه د یو هېواد د نښې او سیمبول په توګه کارول کېږي. همدارنګه ټول هېوادونه په کور دننه ځانګړې سیاسي ډلې لري، چې هغوی ځانته نور بیرغونه هم لرلای شي؛ خو په ټوله کې هر هېواد یوازې یو ملي بیرغ لري، چې پخپلو دفترونو، کنفرانسونو، غونډو او نورو مهمو ځايونو کې ترې استفاده کوي. تاسو به په دې لیکنه کې د بیرغ د کارونې ځايونه وپېژنئ.
په کومو مراسمو او برنامو کې بیرغ مهم دی؟
د یو ملت په توګه باید د هېواد بېلابېل قشرونه او وګړي پخپلو کارځايونو او غونډو کې ملي بیرغ د احترام په پار ولري. په دې برخه کې به تاسو هغه ځايونه وپېژنئ، چې بیرغ پکې مهم رول لرلای شئ.
لومړی ـ نړېوالې برنامې
د هر هېواد چارواکي، چې په نړېواله کچه د خپل وطن نمایندګي کوي، باید په غونډو کې ملي بیرغ موجود وي. په دې برخه کې له مېزي بیرغونو او همدارنګه له لویو بیرغونو ـ چې د ویناوالو شاته وي ـ کار اخیستل کېږي.
دویم ـ بهرني سفارتونه
ټول هېوادونه پخپلو هغو سفارتونو کې چې په بل هېواد کې موجود وي، ملي بیرغ له ځان سره لري. د سفارت د خونو ترڅنګ په بېلابېلو غونډو، کنفرانسونو او نورو برنامو کې ګټه اخیستل کېږي.
درېيم ـ دولتي ادارې
په هره دولتي اداره کې باید د هماغه هېواد ملي بیرغ موجود وي؛ دا پر دې دلالت کوي، چې یاده اداره په دولت پورې اړونده ده. همدارنګه د یو ملي ارزښت په توګه باید بشپړ درنښت ورته وشي.
څلورم ـ فرهنګي او ادبي غونډې
که څه هم د ملت سازۍ لپاره په ټولو ګټورو برنامو کې بیرغ خورا مهم دی؛ خو په ځانګړې توګه په ادبي او فرهنګي غونډو کې باید حتما بیرغ موجود وي. ځکه چې په دې ډول غونډو او ناستو کې ولس ډېر وي او بايد ولس ته د بيرغ د اهميت فکر ورکړل شي.
پنځم ـ تلویزیوني برنامې
که څه هم په هرډول تلویزیوني برنامو کې د بیرغ شتون مناسبه نه برېښي؛ خو په ډېرو مهمو ادبي او فرهنګي برنامو کې که بیرغ موجود وي، کېدای شي عام وګړي ډېر متاثر شي او له بیرغ سره یې مینه پيدا شي.
شپږم ـ نظامي ځايونه
له پورته ټولو مواردو سره ـ سره په نظامي برخه کې خورا کلیدي رول لري. نظامي روزنځايونو، قومندانيو، پوستو او ورته ځايونو کې بیرغ خورا مهم دی. په دې ځايونو کې د مورال، قوت او خپلواکۍ د نښې په توګه باید بیرغ ورپېږي.
اووم ـ سرحدي بندرونه او سيمې
سرحدي بندرونو کې هم د خپلې خاورې د نمایندګۍ په موخه باید بیرغ موجود وي. دا برخه خورا مهمه او د پام وړ ده. په سرحدي سیمو کې لوړ او ښکلي بیرغونه یو هېواد له بل څخه بېلوي.
