ژباړه ـ ریاض مقامزی
پدې ورځو (۲۰۲۲، فیبروي) کې تود خبر دا دی، چې روسیې پر اوکراین برید کړی او په مقابل کې د ياد هېواد ولسمشر، پوځ او خلک د مقاومت په حال کې دي. د جګړې ډګر ته د ولسمشر ورتګ ډېرو خلکو ستايلی او نوموړی یې یو زړور ولسمشر بللی؛ خو پوښتنه دا ده، چې نوموړی څوک دی او څنګه تر ولسمشرۍ ورسېد!؟
پدې لیکنه کې پر همدې موضوع خبرې شوي. د لیکنې تر پایه به په زړه پورې معلومات ولولئ.
پېژندنه
بشپړ نوم یې ویلادیمیر زیلینسکی "Volodymyr Zelenskyy" دی. نوموړی د "۱۹۷۸ز" کال د جنورۍ په پنځه ویشتمه نېټه زېږېدلی دی، چې اوسمهال "۴۴" کاله عمر لري. باید یادونه وکړو، چې نوموړی په یوه یهودۍ کورنۍ کې وزېږېد او پخپله هم د همدې دین پیرو دی. مېرمنه یې "النا کیاشکو" نومېږي، د "اُلِکساندار" او "کیریلو" په نومونو دوه اولادونه هم لري. د زده کړو په برخه کې یې مهمه خبره دا ده، چې له حقوقو فارغ دی؛ خو په یاده برخه کې یې کاري تجربه ډېره نه ده.
له ولسمشرۍ وړاندې یې څه کول!؟
زیلینسکی چې اوسمهال د روسیې پر وړاندې د جګړې رهبري کوي، یو وخت د طنزيه خپرونې چلونکی و. کله چې امریکې ترې له هېواده د وتلو غوښتنه وکړه، او ډاډ یې ورکړ چې هغوی به ورته پناه ورکړي؛ نوموړي دا غوښتنه رد کړه او ویې ویل چې "د وتلو لارې چارې مه ګورئ، زه به مې د ولس ترڅنګ یم. وسلې راکړئ، ترڅو وجنګېږم." پدې توګه زیلنسکي لا محبوبیت پیدا کړ او له خپل هېواد ورهاخوا د نړۍ په نورو سیمو کې یې هم زړورتيا وستايل شوه.
تر ولسمشرۍ څنګه ورسېد!؟
نوموړی تر دې وړاندې چې ولسمشرۍ ته نوماند شي، د یوه طنزيه سريال لوبغاړی و. دا سريال چې "د ملت خادم" نومېده له "۲۰۱۵ز" څخه تر "۲۰۱۹ز" کال پورې په درېيو فصلونو کې خپور شو. زیلینسکي پدې سريال کې د اوکراین د ولسمشر نقش هم لوبولای و. په ۲۰۱۸ز کال کې یې د همدې سريال د جوړونکو "Kvartal 95" په مرسته د "خلکو خادم" په نوم سیاسي ګوند جوړ کړ او په ۲۰۱۹ز کال کې د فساد ضد شعار سره ولسمشرۍ ته نوماند شو. د همدې کال د اپرېل په یوویشتمه نېټه وتوانېد ټاکنې وګټي او پخواني ولسمشر "پترو پروشنکو" ته یې لويه ماتې ورکړه. نوموړي تقریبا اویا سلنه رایې وګټلې او پدې توګه د اوکراین ولسمشر شو. شنونکي پر دې باور دي، چې د نوموړي اکثریت کمپاینونه په ټولنیزو رسنیو کې ترسره شول او ویې کولای شول چې د ځوان نسل رایې خپلې کړي. اوسمهال له سخت حالت سره مخ دی. دا به وخت معلومه کړي، چې پدې برخه کې یې مدیریت کومه نتیجه ورکوي.
