له غوسه ناک (قهرجن)کس سره څنګه رویه وکړو؟
2,287
imranghani
2021-09-07 04:25:00
لېکنه: شکېبا نادري، له غوسه ناک کس سره څنګه رویه وکړو؟
غوسه یوه غیر ارادي کړنه ده، چې په ځوانانو، زړو او آن ماشومانو کې هم لیدل کېږي. ځینې کسان خو د غوسې پرمهال داسې کړنې ترسره کوي چې وروسته بیا پر خپلو کړنو پښېمانه وي، خو د جبران لپاره حللاره نه لري.
د غوسې پر مهال د غوسه ناک کس د ارامولو لپاره موږ باید څه وکړو تر څو هغه بېرته خپل عادي حالت ته را وګرځوو؟
که تاسې هم نه پوهېږئ چې د غوسه ناک کس سره څنګه رویه
وکړئ، زموږ دا لیکنه تر پایه ولولئ! إن شاء الله چې د خپلې پوښتنې ځواب به تر لاسه کړئ.
۱. خپل ځان کنټرول کړئ!
کله چې له یو داسې کس سره مخ کېدئ چې غوسه یې له حده زیاته وه، نو تاسې باید خپل ځان ارامه او کنټرول کړئ، که تاسو هم ورسره د ده په څېر تېزې خبرې وکړئ، حالت به د ښه کېدو پرځای لا خراب شي، ستاسې ارامه اوسېدل د مقابل لوري د غوسې د کمېدو لامل کېږي.
۲. په خبرو کې زموږ کلمه وکاروئ!
که تاسې د غوسه ناک کس پر مخ کې هر ځل زما او ستا کلمې وکاروئ دا د دې لامل کېږي چې غوسه ناک کس د یوازیتوب او پرديتوب احساس وکړي او غوسه یې دوه برابره شي، خو زموږ د کلمې کارول غوسه ناک کس ته د یووالي احساس ورکوي او د ارامۍ لامل یې کېږي.
۳. غوسه ناک کس ته وخت ورکړئ!
ډېری وخت د غوسې پرمهال غوسه ناک کس نه پوهېږي چې څه وکړي؟ او څنګه یې وکړي؟ موږ اړ یو چې هغه ته وخت ورکړو تر څو د خپلې ستونزې لپاره یوه حللاره ولټوي، خو که هغه دا کار نه شوای کولای بیا باید موږ ورته یوه مناسبه حللاره وروښیو، ځکه هغه کسان چې ارامه دي د غوسه ناک کس په پرتله ښه فکر کولای شي.
۴. که شونې وه له غوسه ناک کس څخه د ځای او حالت د بدلون هیله وکړئ!
هر څومره چې یو کس غوسه اوسي د ځای او حالت بدلون یې هرڅه بدلوي لکه، له کوره بهر وتل، له یو ملګري یا ملګرې سره خبرې او مشوره کول، که ناست وي درېدل او که ولاړ وي له خونې بهرکېدل او داسې نورې کړنې د غوسې د کمېدو او له منځه تلو لامل کېږي.
۵. غوسه ناک کس ته یو ګیلاس اوبه ورکړئ!
لکه څنګه چې اوبه اور ګلوي همداسې غوسه هم له منځه وړي، کله مو چې یو کس د غوسې پر مهال ولیده د ارامۍ لپاره یې تر ټولو اسانه او غوره لاره یو ګیلاس اوبه ورکول دي، اوبه څښل په بشپړه توګه غوسه له منځه وړي او د انسان د ارامۍ لامل کېږي.
د دې ټولو لاملونو ترڅنګ نوره لاملونه هم شته چې د ټولو یادول دلته شونی کار نه دی، ځکه دا داسې یوه موضوع ده چې که څېړنه پرې وشي کتابونه کتابونه خبرې پکې لیکل کېدای شي.
