هېڅکله د خوب پر مهال خپل موبایل له ځان سره مه ږدﺉ.

لېکنه: شکېبا نادري، هېڅکله د خوب پر مهال خپل موبایل له ځان سره مه ږدئ.

 زموږ ژوند او بدن د اللهﷻ لخوا هغه راکړل شوې ډالۍ ده چې تل باید ترې ساتنه وکړو. زموږ د بدن هر غړی د یوې ځانکړې کړنې لپاره جوړ شوی، الله یې راته د ښې ساتنه امر کړی، له همدې امله ځان وژنه حرامه ده ځکه الله فرمایي ستاسې د بدن هر غړی زما امانت دی، ما درکړی او زه به یې درنه اخلم، نو ځان ساتنه پر هر مسلمان او مسلمانې فرض ده، زموږ په ژوند کې ډېرې داسې کړنې دي چې کول یې زموږ د بدن هر غړی ان ټول بدن زیانمنوي، لکه د خوب پر مهال ځانته د موبایل نږدې اېښودل.

په دې اړه ډېرې څېړنې شوې چې د خوب پر مهال ځانته د موبایل نږدې اېښودل څومره او څنګه زیانونه لري، او لا هم څېړنې پرې روانې دي. 

څېړونکي وایي چې هېڅکله د خوب پر مهال ځانته موبایل نږدې مه ږدئ، په ځانګړي توګه ځېرک موبایلونه. د ځېرک موبایلونو د سکرین اوبه رنګې شعاع د سترګو د شبکیې پردې سره حساسیت لري. دا شعاع د سترګو لپاره یوه زیان لرونکې شعاع ده، چې دې سترګو ليد کمزوری کوي او د وخت په تېرېدو سره یې له منځه وړي. د دې شعاع د خپرېدو بل زیان دا دی چې د خوب د گډوډۍ لامل هم کېږي. دا ابي رنګې شعاع د ملاټونین هورمون چې د خوب پرمهال ترشح کېږي مخنیوی کوي. دا مخنیوی د دې لامل کېږي چې د انسان خوب گډوډ شي، هغه کسان چې له خوب څخه مخکې له موبایل څخه ګټه اخلي خوب یې نا ارامه او ډېری وخت بې خوبه او ستومانه وي. د دې ترڅنګ په ځینې انسانانو کې د اروایي ستونزو لامل هم کېږي. 

څېړنو ښودلې دي، هغه کسان چې له خوب نه مخکـې له ځېرک موبایلونو څخه ګټه اخلي د هغه خلکو په څېر زیان ورته لري لکه له مخدره توکو څخه چې ګټه اخلي.

څېړونکو دا هم ویلي چې د خوب پر مهال له موبایل څخه ګټه اخیستنه کېدای شي ګڼ شمېر نور زیانونه هم ولري، خو موږ یې تر اوسه په پیدا کولو نه یو بریالي شوي. دا یوه پېچلې او ستونزمنه موضوع ده ډېرې څېړنې ته اړتیا لري چې تر اوسه هم پرې څېړنې روانې دي.

موږ ډېری وخت د دې لپاره چې خپلو ورځنیو چارو ته په سمه توګه ځان ورسوو، د ځان لپاره ساعت برابرو او موبایل خپل ځانته نږدې ږدو، زموږ دا کار هېڅ سم نه دی، ځکه چې د موبایل نږدېوالی موږ ته بېلابېل زیانونه پېښوي اړینه ده چې د دې کړنې لپاره له ساعت څخه ګټه واخلو. 

له یادې شویو خبرو داسې ښکاري چې د خوب څخه مخکې له موبایل څخه ګټه اخیستل او یا د خوب پر مهال ځانته د موبایل نږدې اېښودل ډېر زیانونه لري. موږ اړ یو چې د خپلې روغتیا په اړه فکر وکړو او له ځان نه ساتنه وکړو چې یوه حللاره یې دا ده چې مخکې له خوب نه باید له ګرځندوی یا ځېرک موبایل څخه ګټه وانخلو او له ځان څخه یې لرې کېږدو.